මාධ්‍යවේදියාගේ සටහන්......................

නව වසර උදාවුනා

2012-01-03T22:23:00.003+05:30

ජනවාරි 01

අළුත් අවුරුද්ද උදාවුනා. මේක කැලැන්ඩර් වර්ෂයක ආරම්භය. කැලැන්ඩරය කියන්නේ අවස්ථා ගණනාවක් වෙනස්කම් වලට භාජනය වෙලා නිර්මාණය වුනු දෙයක්. දැන් මුළු ලෝකයම එකම කැලැන්ඩරයක් පිළිගත්තත් අපි කොහොමද දන්නේ ඉස්සර අවුරුද්දට තිබුණේ දින 365 ක්මද කියලා.
කොහොම වුනත් අළුත් අවුරුද්ද කියන්නේ වෙළෙන්දන්ගේ නිර්මාණයක් කියලයි මටනම් හිතෙන්නේ. අවුරුද්ද ඒ තරමටම වාණිජ්‍ය වෙලා.
අද පළමුවැනිදා කියලා මටනම් විශේෂ වැඩක් තිබුණේ නැහැ. උදේ පත්තරේට ලිපි දෙක තුනක් ලියන්න කරුණු හෙව්වා. හවස තිබුණා එක්සත් ජාතික පක්ෂයේ රැස්වීමක් කතළුව හන්දියේ. මෛත්‍රී ගුණරත්න මහතාගේ සංවිධානත්වයෙන්. රනිල් වික්‍රමසිංහට විරුද්ධව තිබුණු මේ රැස්වීමට සිරස නාලිකාවත් සහභාගීවෙලා තිබුණා. ඔවුන්ට රනිල් වික්‍රමසිංහ ප්‍රධානය කරපු ගලත් අරගෙන රට වටේ යන්න පටන් අරගෙන.
මෙතන කැපී පෙනුනු චරිතයක් තමයි සෝම අක්කා.
සෝමා අක්කා කියන චරිතය එක්සත් ජාතික පක්ෂයේ ගාල්ලේ රැස්වීම් වාර්තා කරන ඕනම කෙනෙක් දන්නවා.
ඇය පක්ෂය වෙනුවෙන්ම කැප වෙලා ඉන්නවා. හබරාදුව ආසනයට පක්ෂයෙන් මොන සංවිධායක ආවත් එයා වෙනුවෙන් දිවි හිමියෙන් වැඩකරන සෝම අක්කාට එක්සත් ජාතික පක්ෂයෙන් ලැබුණු දෙයකුත් නැහැ. එයා දන්නේ අලියා හොදයි. කොළ පාට හොදයි . අපි කැපුවත් කොළ කියන්න විතරයි. රටේ දේශපාලන ප්‍රවාහය ගැන, ආර්ථිකය ගැන කිසිම දැනුමක් එයාට නැහැ. ඒ අහිංසක සෝම අක්කාට විතරක් නෙවෙයි රටේ බහුතරයකට මේ දැනුම නැති නිසා තමයි අපිට මේ තරම් කෙල වෙලා තියෙන්නේ

ජනවාරි 02

අද පත්තරේ අද දවසට නොමිළේ බෙදනවා. මමත් නොමිලයේම එකක් ගත්තා. අළුත් පත්තරේට තියෙන්නේ අළුත් මුහුණුවරක්. දැකපු ගමන්ම ආස හිතුනා. ඇත්තටම ඒකට ගොඩක් දේවල් ලියන්න පුළුවන් කියලා හිතුන නිසා දවල් වෙලා පත්තර කන්තෝරුවට කෝල් කරලා ප්‍රධාන කර්තෘ කාංචන දසනායක සම්බන්ධ කර ගත්තා. ‘‘අපිට ලංකාදීපෙ රාමුවෙන් වෙනස් වෙන්න කියලා තියෙන්නේ. ඒ නිසා තවම ලංකාදීපයේ අයත් එක්ක වැඩ කරන්න පටන්ගත්තේ නැහැ.‘‘ ඔහු එහෙම කිව්වා.
ඇත්තටම ඒක හොද දෙයක් කියලා මට හිතෙනවා. අපේ බොහොමයක් මාධ්‍යවේදීන් පත්තර කිහිපයකට විවිධ නම්වලින් ලියනවා. ඒ නිසා හැම පුවත් පතේම යන්නේ එකම ලිපිය. ඇතැම් අය මීට මාස කිහිපයකට පෙර එක පත්තරයකට ලියපු විශේෂාංගය පොඩ්ඩක් වචන එහා මෙහා කරලා තවත් එකකට ලියනවා. තව සතියකින් දෙකකින් තවත් එකකට ඒකම ලියනවා. මේක ලොකු වරදක්. එහි ප්‍රතිඵල භයානකයි. ඒ නිසා විජය පුවත් පත් සමාගමෙන් ආරම්භ කරපු අද පුවත්පතේ ස්ථාවරය හොදයි කියල මම හිතනවා.

ජනවාරි 03

අද උදේම කිතුලම්පිටිය ආනන්ද විදුහලේ ළමුන් සහ දෙමාපියන් පිරිසක් පාරට බැහැලා. ඔවුන් තමන්ගේ පාසල යළිත් ඉල්ලනවා. ආනන්ද විද්‍යාලයේ හයවැනි වසර ඊයේ සිට ඉවත් කරලා. ඊයේ පාසල් ගියාට පස්සේ තමයි ඒ ළමයි දන්නේ තමන්ට පාසලේ ඉඩක් නැති බව. ඔවුන්ට වාඩිවෙන්න පුටුවක් නැහැ. උගන්වන්න ගුරුවරයෙක් නැහැ. අද දෙමාපියන් සමග මේ ළමුන් එළියට බැහැලා. ඔවුන්ට උළුවිටිකේ රිචඩ් පතිරණ විද්‍යාලයට යන්න සිදුවෙනවා කියා දෙමාපියන් මැසිවිලි නගනවා. මේ අවස්ථාව වාර්තා කරන්න අපේ මාධ්‍යවේදීන් කිහිප දෙනෙක්ම ගිහින් හිටියා.
මෙතෙන්දී අපේ අය අනුමත කළ නොහැකි දේවල් කරනවා. කොහේ හරි පාසලක් වෙනුවෙන් යම් පිරිසක් උද්ඝෝෂණය කරනවානම් විද්‍යුත් නාලිකා වලින් කියන්නේ ලොකු දෙයක් වුනේ නැතොත් වැඩක් නැහැ කියලා . දැන් අපේ අය මේ අහිංසක මිනිසුන් ලවා ලොකු දේවල් කරවනවා. අදත් ඒ දේම වුනා. අහිංසක විදියට පාසල ඉදිරිපිට උද්ඝෝෂණයේ යෙදුණු අය කලේගානේ පිහිටි කලාප කාර්යාලයට ගියේ පා ගමණෙන්. විද්‍යුත් නාලිකා වලට මේ නිසා හොද රූප රාමු ලැබුණා.
ඒ වගේම ටික වේලාවකින් පාර මැද ටයර් කිහිපයක් ගිනිබත් වුනා. ටයර් ගිනි තියපු එක පිටිපස්සෙත් අපේම මාධ්‍යවේදියෙක් ඇති කියල තමයි මට හිතෙන්නේ.

මාධ්‍යවේදියා තෝරාගන්නා නිලධාරීන්

2011-12-28T19:13:00.002+05:30

ගොඩක් දවසකට පස්සේ මාධ්‍යවේදියාගේ සටහන් නැවත ආරම්භ කරන්න හිතුවා. එන අවුරුද්දේනම් දිනපතා ලියාගෙන යන්න අදිටන් කරනවා. මාධ්‍යවේදියකු ලෙස අපිට මුහුණ පාන්න සිදුවන දේවල් වෙනත් වෘත්තියක නියැලෙන්නන්ට මුහුණපාන්න නොලැබෙන නිසා මේක එක්තරා විදියකට බොහෝ දෙනෙකුට වැදගත් වේවි.
අද උදේ පාන්දරින්ම දුරකථන ඇමතුමක් ආවා. කථා කරපු කෙනා අහනවා අදුන ගන්න බැරිද කියලා. කොහේ අදුනන්නද එයාගේ අංකය මා සතුව තිබුණේ නැහැ. ටිකකින් කියනවා අපූරු ප්‍රවෘත්තියක් දෙන්න තියෙනවා ඒ නිසා එයාගේ කාර්යාලය පැත්තේ එන්න කියලා. කාර්යාලය ගාල්ල දිස්ත්‍රික් පාරිභෝගික අධිකාරිය.
පැයකට විතර පස්සේ මම ගියා. ඔවුන් මා බලාපොරොත්තුවෙන් ඉදලා.
මම පාරිභෝගික අධිකාරියේ ප්‍රවෘත්ති ගන්න නිතර නිතර යන කෙනෙක් නෙවෙයි. නමුත් බීට්ටු වාර්තාකරණයට පුරුදු වෙලා ඉන්න අය ඔවුන් සොයාගෙන නිතර ගිහින් මොනවා හරි ලියනවා.
අපි මේක දෙන්නේ ඔයාටම විතරයි. වෙන කාටවත් දෙන්නේ නැහැ. ඔවුන් මා සමග එසේ කීවා.
ඇයි ඒ මම ඇහුවේ විමතියෙන්.
නෑ මෙහෙට එන අය නිකම්ම නිකම් ප්‍රවෘත්තිය ලියනවා. නමුත් අපිට මේක ටිකක් මිනිස්සුන්ට දැනෙන විදියට ලියන්න ඕන.
අපි අතර වැඩි ඇසුරක් නොතිබුණත් ඔවුන් මගේ ලේඛණය ගැන විශ්වාසය තැබීම සතුටක්. මම වැඩේ බාර ගත්තා.
කතන්දරේ මොකක් ද කියලා මම කියන්නම්
නීති විරෝධී ළදරු කිරිපිටි වර්ගයක් ලංකාවේ වෙළද සැල් වලට ඇවිල්ලා.
යම් කිිපිටි වර්ගයක් මෙරට විකුණනවානම් ඒ කිරපිටි ඇසුරුමේ සදහන් විය යුතු කාරණා කිහිපයක් තියෙනවා
ඉන් එකක් තමයි මව්කිරි ලබාදීම පෝෂ්‍යදායී බව.
ඒ වගේම කිරිපිටි මව්කිරි වෙනුවට ආදේශකයක් බව සදහන් නොවිය යුතුයි. ඒ වගේම මාස හයකට වඩා අඩු දරුවන්ට මේවා ලබාදෙන බවක් සදහන් කරන්න කිසිසේත්ම හැකියාවක් නැහැ. තවත් දෙයක් තියෙනවා කිරිපිටි වර්ගය සාදාගන්නා ආකාරය සිංහලෙන්, දෙමළෙන් සහ ඉංග්‍රීසි භාෂාවෙන් පැහැදිලිව සදහන් විය යුතුයි. ඒ වගේම වරක් සාදාගන්නා ලද පිටි තියාගෙන ඉදලා භාවිතා කරන්න බැරිබවත් මේ ඇසුරුමේම දැක්විය යුතුයි.
පාරිභෝගික අධිකාරියේ නිලධාරී මහත්වරුන්ට හමුවෙලා තියෙන මේ කිරිපිටි වර්ගය මේ ඉහත මම කියපු කාරණා සියල්ල උල්ලංඝනය කරලා. මේ කිරිපිටි ඇසුරුමේ එකම සිංහල වචනයක්වත් නැහැ. ඒ විතරක් නොවෙයි ඉංග්‍රීසි භාෂාවත් මෙහි දක්නට නැහැ. අරාබි රටවල් වෙනුවෙන් නිෂ්පාදනය කරපු කිරිපිටි වර්ගයක් තමයි මේ විදියට ගෙන්වලා තියෙන්නේ. ඔවුන් මගෙන් ඉල්ලා සිටියේ ලංකාව පුරා දෙමාපියන් මේ පිළිබදව දැනුම්වත් වන පුවතක් පලකරන්න කියලා. ඔන්න මම වැඩේ බාරගත්තා. බලමු මොනවද වෙන්නේ කියලා.

වදුරාට කළ ශල්‍යකර්මය

2010-09-29T22:50:00.003+05:30

ෙම් ෙද් සිදුෙවලා ටික දවසක් ෙවනවා. හදිසිෙය්ම මට දුරකථන අැමතුමක් අාවා. ඒයින් කියවුෙණ් උණවටුන ගුරැ විද්‍යාලෙය් වදුෙරක් ඉන්නවා කියලා. අපි වහාම ගියා. ඒ් වදුරෙග් අතක ෙලාකු තුවාලයක්.අපි වදුරා අල්ලලා ෙෙවද්‍ය වරියක් ලගට ගිහින් ශල්‍ය කර්මයක් කළා.
වදුරා තුවාල වුෙණ් ෙකාෙහාමද කියලනම් අපි දන්ෙන් නැහැ. ඒ්ත් ෙම් වදුරා බිම ඉන්නෙකාට තමන් ලගින් යන හැෙමා්ටම තුවාල ෙවච්ච අත ෙපන්නලා. ඊට පස්ෙස තමයි ගුරැ විද්‍යාලෙය් ශිෂ්‍ය ගුරැවරැ අපිට කථා කෙෙළ් . ඉතින් අපි අෙප් යුතුකම් ෙකාටස ඉටු කළා.

ෙබාෙහා් කාෙලකට පස්ෙස්

2010-08-24T02:16:00.002+05:30

මාස තුනක පමණ කාලයක් බ්ෙලාග් ඒක ලියන්න බැරි වුනා. දැන් අකුරැ වදින්ෙනත් වැරදි විදියට. ඒ් නිසා ඉක්මනටම ඒ් අඩුපාඩු හදාෙගන අායිත් ඉතින් ෙනාකඩවා ෙම්ක ලියන්න ඔ්ෙන්.

තනිවූ සීගිරිය සමුගනියිද ..................?

2010-05-09T19:55:00.002+05:30

බ්‍රහස්පතින්දා දවසේ පත්තර කන්තෝරුවෙන් ලැබුණේ ඉතාමත්ම අසුබ ආරංචියක්..... මම ටික වෙලාවක් එකතැනක නැවතිලා කල්පනා කළේ සිදුවෙලා තියෙන විනාශය ගැන. මේ වෙනුවෙන් අපිට මොකක් ද කරන්න පුළුවන් කියලා හිතුවත් අන්තිමේ දී තේරුම්ගියා අපිට කිසිම දෙයක් කරන්න බැහැ කියලා.
ඕනම කෙනෙක් ඕනම වෙලාවක මගෙන් ඇහුවොත් මේ ලෝකේ වැඩියෙන්ම ඇළුම් කරන්නේ කොතනට ද කියලා. මම කිසිම පැකලීමකින් තොරව කියන්නේ ඒ සීගිරියට කියලා. ඒත් දැනගන්න ලැබුණා සීගිරියේ චිත්‍ර වලට කෘමි විශේෂයක් හානි කරන බව.
පරිසරයට විනාඩියක් වැඩසටහන කිරීමෙන් ලබාගත් පාරිසරික දැනුමත්, පුරාවිද්‍යාව හැදෑරීමෙන් ලැබූ පුරාවිද්‍යාත්මක දැනුම්ත් සංකලනය වූ මට එකවරම මතක් වුණේ සීගිරියේ කෘමීන් ආක්‍රමණයට පෙර එහි සිටි බඹරැන් ඉවත් කිරීම ගැන. මම මගේ ප්‍රාදේශීය ප්‍රවෘත්ති කර්තෘ තුමාට කථා කරලා මේ ගැන කිව්වා.
සජීව, ඔයාට සියයට සියයක්ම විශ්වාසනම් වැඩේට බහින්න. අහුමුළු නැතිවෙන්න හොයන්න. ඔහු කිව්වේ මාව නැවත නැවතත් දිරිමත් කරමින්. මම ඉන්නේ ගාල්ලේ සීගිරියේ සිදුවන දේ සොයන්න අමාරුයි ඒත් මම වැඩේට බැස්සා.
බඹරුන් ගැන ලියවුණු පර්යේෂණ පත්‍රිකා සොයා බැලුවා. සීගිරියට අළුතෙන් ආවායැයි කියන කුඹලුන් ගැන විස්තර හෙව්වා. මම විශ්ව විද්‍යාල මහාචාර්යවරැ ගණනාවකට කථා කළා. ඔවුන් සියළු දෙනාම කිව්වේ ඒක වෙන්න පුළුවන් වැඩක් කියලා. මගේ මතය වුණේ පරිසරයේ ආහාරදාමයේ එක් පුරැකක් වූ බඹරැන් ඉවත් කිරීම නිසා වෙනත් කෘමියෙක් ඉස්මතුවෙලා කියන එකයි. අවසානයේදී මගේ දැනුම ආචාර්ය මහාචාර්ය වරැන්ගේ උදව්වෙන් තහවුරැ කරගන්න හැකියාව ලැබුණා. ඒ අනුව සිරස රෑපවාහිනී සේවයේ බ්‍රහස්පතින්දා රාත්‍රියේ ප්‍රවෘත්ති ප්‍රකාශයේ ප්‍රධාන පුවතක් වුනේ සීගිරියේ චිත්‍ර වලට හානි සිදුකරන කෘමින් පැමිණියේ බඹරැන් ඉවත් කිරීම නිසා බවයි. සෙනසුරාදා ලංකාදීප පුවත් පතේත් ඉරිදා ලංකාදීප පුවත් පතේත් මගේ මේ හෙළිදරව් කිරීම පළවනවා. මේ සම්බන්ධව අනිත් මාධ්‍ය ආයතනත් අවදි විය යුතුයි.
ඔබගෙන් අපි ඉල්ලා සිටි‍න්නේ එකම එක දෙයයි. සීගිරියට කෘමි හානිය සිදුවූයේ බඹරුන් ඉවත් කිරීම නිසා බව අපි විද්‍යාත්මක පැහැදිලිකිරීම් අනුව ප්‍රකාශ කර තිබෙනවා. මෙයට එරෙහිව අපි දැවැන්ත හඩක් නැගිය යුතුයි. අද සීගිරිය වගේ හෙට තවත් ස්ථාන විනාශ වන්නට ඉඩ නොදිය යුතුයි. ඒ වගේම බඹරුන් ඉවත් වී තනිවූ සීගිරිය සමුගන්න ඉඩ නොදිය යුතුයි.

මගේ අළුත් පොත් - කාන්තාරයේ දරුවෝ

2010-04-25T01:18:00.003+05:30

මානව කාන්තාරයේ දරැවවෝ කතුවරිය වන වාරිස් ඩයරි සිය මිතුරිය වන මාධ්‍යවේදිනී කොරින්නා සමග එක්ව ස්ත්‍රී චර්මඡේදනයට විරුද්ධව යුරෝපය තුළ ඇය ගෙන යන අරගලය මෙම කෘතියට විෂය වී ඇත.

අප්‍රිකානු කාන්තාවෝ එවුන්ගේ චාරිත්‍රයකට අනුව ස්ත්‍රී චර්මඡේදනය නමැති ව්‍යසනයට ගොදුරැ වෙති. යුරෝපීය කාන්තාවෝ සිය ලිංගේන්ද්‍රිය අලංකාර කරගැනීම සදහ චර්මධේදනය කරවා ගනිති. අප්‍රිකානුවන් පසුගාමී ම්ලේච්ඡ කොටසක් වහයෙන් සලකන මේ ශිෂ්ට සම්පන්න යැයි කියාගන්නා යුරෝපීය කාන්තාවෝ බුරුතු පිටින් කෘතිම රූපලාවන්‍ය සායනයන් වෙත ගොස් නීත්‍යානුකූලව චර්මඡේදනය කරවා ගනිති. යුරෝපීය කාන්තාවන් අතර සිදුවන ස්ත්‍රී ලිංගේන්ද්‍රයේ පෙනුම සම්බන්ධව ඔවුන් තුළ කිස්යම් පරමාධ්‍යාශයක් නැතිනම් කල්පිතයක් තිබබෙන බවයි. ස්ත්‍රී චර්ම ඡේදනය ගැන කතාකරන බොහෝ අවස්ථාවල බොහොමයක් දෙනා කියා සිටින්නේ අප්‍රිකාවේ චර්මඡේදනය සිදුවන්නේ පුරැෂ පක්ෂයේ අවශ්‍යතාවයක් මත බවයි. එසේ නම් යුරෝපයේ තත්ත්වය කෙසේ ද ? යුරෝපය තුළ ද පුරැෂ පක්ෂය තුළ ඇති සෞන්දර්යය සංකල්පයට අනුව ස්ත්‍රිය ක්‍රියාකරන බැව් පැහැදිලිව පෙනෙන්නට තිබේ. එසේ නැතිනම් ස්ත්‍රී ලිංගේන්ද්‍රිය අලංකාර කරගනු වස් මෙවැනි කෘත්‍රිම රූපලාවන්‍ය සදහා වෛද්‍ය සායන පවතින්නේ කෙසේද ?

ෂල්මන් රෂ්ඩි නමැති ශ්‍රේෂ්ඨ ගත්කරුවා මෙසේ පවසා ඇත. "ඔබ පින්තූරයෙන් පිටතට පැමිණෙන තුරැ ඔබට සම්පූර්ණ පින්තූරය දැකගැනීමට නොහැකිවනු ඇත". පන්තූරයෙන් පිටතට පැමිණෙන්නට දැන් කාලය එළඹ ඇත.

පරිවර්තනය - රංජිත් කුරුප්පු

ප්‍රකාශනය - ෆාස්ට් පබ්ලිෂින් (ප්‍රයිවට්) ලිමිටඩ්, සුරස පොතක්

මිල - රු.225.00

ISBN 978-955-1822-66-8

පරිවර්තකගේ වෙනත් පරිවර්තන

මරණයේ දොරටුව

යුද්ධයේ අතුරු කතාවක්

හිට්ලර්ගේ අවසානය

කාන්තාරයේ කුසුම

ගිනි මැද සක්මන

කළු මුද්දේ අභිරහස

2010-04-25T01:07:00.002+05:30

කළු මුද්දේ අභිරහස

සිංහලයේ ලොව පුරා අතිශයින් ජනප්‍රිය වූ GOOSEBUMPS කතා පොත් පෙළ ලියූ අර්.එල්.ස්ට්න්ගේ "HORRORS OF THE BLACK RING" නම් ප්‍රකට කතාවක සිංහල පරිවර්තනය "කළු මුද්දේ අභිරහස" නමින් ප්‍රකාශයට පත් වී තිබේ.

දරුවන් තුළ කියවීමේ පුරුද්ද ඇති කිරීමේලා ප්‍රධාන සාධකය වනුයේ ඔවුනටම උචිත භාෂාවකින්, ඔවුන් සිත් ඇද ගන්නා කතාවක් ඉදිරිපත් කිරීමය. සැබෑ ලොව යතාර්ථයන් හි, අත්දැකීම් විදීමට පෙර ළමා මනස ආකර්ෂණය කරගත හැකි අත්දැකීමක් ඔවුනට තිළිණ කිරීමට ගත් පරිවර්තකගේ උත්සාහය ඇගැයිය යුතුය.

පරිවර්තනය - සුධර්මන් සතරසිංහ

ප්‍රකාශනය - ෆාස්ට් පබ්ලිෂින් (ප්‍රයිවට්) ලිමිටඩ් , සුරස පොතක්

මිල - රු.175.00

ISBN 955-1188-54-3

මගේ අළුත් පොත් - අපේ ගම මාතර

2010-04-25T00:45:00.001+05:30

මාතරට නුදුරු ගමක උපතලැබූ කතුවරයා කල් ගතවේද්දී මාතරට සමුදී වෙනත් නගරයක පදිංචියට ගිය පසු තමන් දුටු මාතර ගැන ලියූ ග්‍රන්ථයකි. මව්බිම අතහැර දමා පිටරටක පදිංචියට ගිය බොහෝ දෙදනා තමන් අතහැර ආ මව්බිම සිහිනයෙන් දකිති. සිහිනයෙන් දකින මව්බිමම්ෙ හැම දෙයක්ම සුන්දරය. කෑ බිව් හැම දෙයක්ම සුමිහිරිය. ඇසට දුටු හැම දසුනක්ම මනහරය. මව්බිම නොව උපන්ගම අත්හැර දමා වෙනත් නගරයක පදිංචියට ගිය කතුවරයා එක්දහස් නමසිය පනස් ගණන් වලදී මාතර දුටු අයුරු ඔහුගේ සිතේ ඇදී ඇති ආකාරයෙන් මෙහි සටහන් තබා ඇත.

කතුවරයා පවසන්නේ තමන් ග්‍රන්ථයේ සටහන් තබා ඇති ඇතැම් චරිත පිළිබදව එහුගේ මතකයෙහි පටලැවිල්ලක් තිබිය හැකි බවයි. එමෙන්ම මාතර පැවැති කුල භේදය ගැන මෙහි විවෘතව කථා කර තිබේ. ඇතැම් සිද්ධි හා පුද්ගලයන් ගැන ඔහු ලියන දේවල් හේතුවෙන් යමකුට චිත්ත පීඩාවක් ඇතිවේයැයි සිතෙන විට ඒ නම් යම් පමණකින් වෙනස් කළ බවද කතුවරයා සදහන් කොට තිබේ.

ලේඛකයා - සමරසිංහ ගුණසේකර

ප්‍රකාශනය - සුනෙර ප්‍රකාශකයෝ

මිල - රු.260.00

ISBN 978-955-9128-93-9

සමරසිංහ ගුණසේකර මහතා

සමරසිංහ ගුණසේකර මහතා මාතර රාහුල විද්‍යලයෙන් මූලික අධ්‍යාපනය ලබා තෙලිජ්ජවිල මධ්‍ය මහා විද්‍යාලයේ උසස් පෙළ හදාරා පේරාදෙණිය විශ්වවිද්‍යාලයට පිවිසුණේය. කොළඹ , විද්‍යොදය යන දේශීය විශ්වවිද්‍යාලවලද එක්සත් රාජධානියේ හැරියට් වොට්, ඕස්ට්‍රේලියාවේ මොනෑෂ් යන විදෙස් විශ්වවිද්‍යාල වල උසස් අධ්‍යාපන ලබා ඇත. ඉංග්‍රීසි භාෂාවෙන් ලියවුණු ග්‍රන්ථ රැසක් සිංහලයට පරිවර්ථනය කරන ලද ගුණසේකර මහතා නීතිඥයෙකි.

කතුවරයාගේ වෙනත් පොත්

තනි කූඹියා

ගහකොළ අපේ යාළුවෝ

අමුතු වැඩට කැමති අයට

පමා වුණත් එමි අකුරටමෙන්න අපේ අමුතු සේන

හිනායන කතාවක්,

එයි අම්මා විගසකිනේ

සැරසේන් ! එලවේන ! යා........... !!!!!!!!!!!!!!!

2010-04-24T17:56:00.002+05:30

ඔන්න බොලේ මටත් ආවා මැරතන් තරගයට තහවුරැ කිරීමේ සටහන. දැන් මමත් සූදානම් මැරතන් දුවන්න. ඒත් ඉතින් වැස්ස තමයි බාධකය. මේ දවස් ටිකේම අනෝරා වැසි වසිනවා. වැස්සත් එකක් ඉතින් විදුලි කෙටීම. විදුලි කොටන විට ඉතින් අන්තර්ජාල සම්බන්ධතාවත් ඉවරයි. කාලගුණය යහපත් තත්ත්වයක තිබුණොත් මමත් තරග කරනවා. කමක් නෑ පහු වෙලා හරි තරගයට එකතුවෙන්න ලැබුණොත් ඒකත් හොදයිනේ........... කාලගුණය යහපත් වුණ ගමන්ම මාත් එනවා.

ප්‍රතිපත්ති ගැන නොසිතා දෙන ඡන්දය - 2

2010-04-06T20:40:00.002+05:30

අපේ රටේ ඡන්ද දායකයෝ තමන්ට ලැබී ඇති සර්වජන ඡන්ද බලය කියන දේ පාවිච්චි කරන ආකාරය ගැන මම ලබපු අත්දැකීම් සටහන් කරන දෙවැනි අවස්ථාවයි මේ. මගේ යාළුවෙක් ඉන්නවා. එයා මුස්ලිම් ජාතිකයෙක්. හරිම හිත හොද මනුස්සයා. මෙයා මට කියනවා මුස්ලිම් කොන්ග්‍රසය එකතුවෙන්නේ මොන පක්ෂයටද මම ඒ පක්ෂයට ඡන්දය දෙන්නේ නෑ කියලා. මම කිව්වා උඹනම් මාර බඩුවක්නේ ඇයි ඒ කියලා. අනේ මන්දා එදා ඉදලම මට උන්ව පේන්න බැහැ කියලා තමයි මිනිහා උත්තරදුන්නේ. එයාට පැහැදිලි හේතුවක් නැහැ.
මට මේ ලගදී දවසක් එක්සත් ජනතා නිදහස් සන්ධානයේ ඉතාමත්ම ජනප්‍රිය තරුණ අපේක්ෂකයකුගේ නිවසේදී (තරුණයි කිව්වට 40 පැනලා) ජනතා විමුක්ති පෙරමුණේ පූර්ණ කාලීන සාමාජිකයෙක් හමුවුනා. මිනිහා මාව දැකලා ටිකක් වසන් වෙන්න උත්සාහගත්තත් මම එයා එක්ක කතා කළා.
මල්ලී මොකද මෙහේ. මම ඇහුවා.
ගෙදරින් බේරුමක් නෑ අයියේ.... රස්සාවක් හොයාගන්න කියලා. අම්මලාගෙන් වදේ කොහොම හරි මෙතුමාට සෙට් වෙලා දිනුවම රස්සාවක් හොයා ගන්න කියලා කියනවා. ඒ නිසා මම ආවා.
මේ පුද්ගලයා ඒ අපේක්ෂකයා වෙනුවෙන් ගෙයින් ගෙට ගියා දින දහයකට වඩා. ඔහු බලාපොරොත්තු වෙන්නේ රැකියාවක්. ඒත් අර අපේක්ෂකයා මන්ත්‍රීවෙලා ඇමති කෙනෙක් වුනත් රස්සාවක් දේවිද ?
මේ පාර ඔයාගේ ඡන්දේ බුලත් කොලේට නේද මම ඇහුවා.
හිනාවෙලා මගේ කණට කොදුරලා මිනිහ කිව්වේ. පිස්සුද අයියේ මුන්ට වැඩකරනවා කියලා පෙන්නලා කුසලානෙට ඡන්දෙ දෙනවා
අපේ පත්තර කාරයෙක් ඉන්නවා. අහින්සක මනුස්සයා. මිනිහා කියන්නේ එයා රජයේ මාධ්‍යවේදියෙක් කියලා. මෙයා පසුගිය පළාත් සභා මැතිවරණයේදී හිටපු සහ වර්තමාන මහ ඇමතිවරයාට විරුද්ධව ඡන්ය දුන්නා විතරක් නෙවෙයි හැමතැනම ඔහුව විවේචනය කරමින් ගියා. ඒත් ජනාධිපතිවරණයේදී ජනාධිපතිතුමාට බැහැලා වැඩ. දැන් පොදු පෙරමුණට බැහැලා වැඩ. මම ඇහුවා මේ ඇයි කියලා. එයා කොහොමත් ශ්‍රී ලංකා කාරයාලු. මහ ඇමතිතුමාගෙන් දූට රස්සාවක් ඉල්ලුවාලු ඒක දුන්නේ නැති නිසා විරුද්ධව වැඩ කළාලු. ඒත් පක්ෂය දිනවනවාලු.
මේ තවත් පත්තර කාරයෙක් විදෙස් රටක සේවය කරලා මෑතකදී ලංකාවට ආපු මෙතුමා අපත් සමග එක්තරා අපේක්ෂකයකුගේ රාත්‍රී සුහද හමුවකට සහභාගී වුනා. මාධ්‍යවේදීන් හැටියට අපි කාටවත් කඩේ යායුතු නැහැ. ඒ වගේම කවුරැ දිනුවත් පැරදුනත් අපිට කමක් නැහැ. මේ අපේක්ෂකයා කතාවක් පවත්වලා ප්‍රශ්න ඇසීමට මාධ්‍යවේදින්ට අවස්ථාව දුන්නා. මෙන්න අපේ මේ කියපු සහෘදයා නැගිට්ටා. ඔබතුමා තමයි ලැයිස්තුවේ පළමු වෙනියා. ඒ වගේම අපි ඔබතුමාට ඇමතිකමක් ලැබේවා කියලා ප්‍රාර්ථනා කරනවා. කියමින් මාර සුදු හුණු ගෑමක් කළා. එයා නැවැත්තුවා විතරයි තවත් එක්කෙනෙක් නැගිට්ටා. එයත් කියන්න ගත්තා තමන්ට අපේක්ෂකයාගේ පියාගෙන් ලැබුණු උදව් සහ ඒවාට තමන් කළ කෘතගුණ සැළකීම් මුන් දෙන්නාම මාධ්‍ය ජීවිතයම පාවලා දෙද්දී අපි නැගිට්ටා. අපි දෙන්නෙක් නැගිටලා එළියට බහින කොට අපේ පිටිපස්සෙන් තවත් 20 ක් විතර කොන්ද පණ තියෙන මාධ්‍යවේදීන් ආවා. අර දෙන්නා මතක ඇති කාලෙකනම් ආපහු ඒ වගේ වැඩක් කරන එකක් නැහැ. අපි ඒ අපේක්ෂකයා එක්ක අමනාපයක් නැහැ. ඒත් කරන්න තිබුණු හොදම දේ ඒ වෙලාවේ කළා.
මට තවත් අපූරු පුද්ගලයෙක් මුණ ගැසුණේ ගාල්ලේ ටිකක් දුෂ්කර ගමකදී මේ මනුස්සයාගේ ගෙදරට අපි ගොඩවුනේ වැස්සකට. මෙයාට වයස අවුරුදු 75 ක් විතර ඇති. එයා ඡන්දෙ දාන්න දන්නේ නැහැ. ජනාධිපතිවරණය කිට්ටු දවසක තමයි අපි මේ ගෙදරට ගොඩවුණේ. අපි ඒ ගෙදර ඉදිද්දී රෑපවාහිනී නාලිකාවක නිමල් සිරිපාල ද සිල්වා මහතාව පෙන්නුවා. ඒ පාර මේ තැනැත්තා අපිට කියනවා ඔය ඉන්න මහත්තයානේ ජනාධිපතිවරණයට ඉල්ලන්නේ කියලා. ඒතමයි ඒ මනුස්සයාගේ අවබෝධය. අපේ එක්කෙනෙක් ඇහුවා. අංකල් කාටද ඡන්දෙ දෙන්නේ කියලා. ඉස්සරනම් මහත්තයෝ අලියට දුන්නා. ඒත් දැන් කාට දෙන්නද කියලා දන්නෙ නැහැ. පුතා ඇවිත් ඡන්ද මධයස්ථානෙට එක්කගෙන යනවා. කොලේක මොකක් හරි ඇදල දුන්නම මම ගිහින් එතන මහත්තයෙකුට ඒක පෙන්නලා ඡන්දෙ දාන්න කියනවා. ගියපාරත් දුන්නේ ඒ විදියට මම දීපු කෙනා දිනුවද දන්නෙත් නැහැ.
ඔන්න ඕක තමයි අපේ මිනිස්සුන්ගේ තත්ත්වය. තවත් ටිකක් හෙට.............

ප්‍රතිපත්ති ගැන නොසිතා දෙන ඡන්දය

2010-04-04T22:32:00.002+05:30

අපේ රටේ මැතිවරණයකදී මේ රටේ මිනිසුන්ටනම් ප්‍රතිපත්ති ගැන වගේ වගක් නැහැ. ඔවුන් තමන් ඡන්දය දෙනේනේ කවරකුට දැයි තීරණය කරන්නේ මහා පුදුමාකාර ආකාරයට. මේ ඒ වගේ කීප දෙනෙක් මා සමග කියපු කථාවක්.
අපේ සහෝදර මාධ්‍යවේදියෙක් ඉන්නවා. මිනිහා පරම්පරාගත යූඑන්පී කාරයා. මුලදි කිව්වා යූඑන්පී එකට ඡන්දෙ දෙනවා කියලා. ඉතින් ඒක සාමාන්‍ය දෙයක්නේ. ටික දවසකට පස්සේ මිනිහා කිව්වා කුසලානෙට ඡන්දෙ දෙනවා කියලා. ඇහුවහම කිව්වේ ෆොන්සේකාට කරපු අසාධාරණය නිසා දෙනවා කියා. එයාගේ ගුරුමණ්ඩලයේ අයත් වැඩි දෙනෙක් කුසලානෙට දෙනවා කිව්වා. ඊයේ මෙයා කියනවා මමනම් සන්ධානයට තමයි කියලා. මම පුදුම වෙලා අහුවා අැයි කියලා. මෙන්න ඒ පාර කියනවා අපේ දූගෙ ඉල්ලිමට වෙනස් වුනා කියලා. ඇයි දූට රස්සාවක් ලැබෙනවාද කියලා ඇහුවහම මෙයා කියන්නේ දූ යන ඉස්කෝලෙ හදපු රිචඩ් පතිරණගෙ පුතාට ඡන්දෙ දෙන්න ඕන කියලා දූ අඩනවලු ඒ නිසා ගෙදර හැමෝම එයාට ඡන්දෙ දෙනවළු. ඒක එතුමාගේ කැමැත්තනේ.
ඔන්න දවසක් මට හමුවුණා තවත් ඇමතිවරයෙක්. මෙයා කියනවා මම පළාත් සභාවේදි නිශාන්ත මුතුහෙට්ටිගමට ඡන්දය දුන්නා කියලා. මම ඇහුව ඇයි විශේෂය කියලා. එතකොට කියනවා එයාව හැමෝම කොන් කරන නිසා මම ඡන්දය දුන්නා කියලා.
ඉතින් දවසක් වෛද්‍යවරයෙක් මාර කතාවක් කිව්වා. නිශාන්ත ෆුල් ආතල් එකක් දෙනවා. ඒ නිසා මම ඡන්දෙ දෙනවා කියලා. එතන හිටපු තවත් කෙනෙක් කියනවා පරණ ඇමතිවරු පහලට ඇදලා නිශාන්ත වගේ කෙනෙක් පළමුවැනියා කරන්න ඕන නිසා මම ඡන්දෙ දෙන්නේ එයාට කියලා.
මම දවසක් ත්‍රී වීලර් එකක යද්දී ඒ රියදුරාගෙන් ඡන්‍දය ගැන අහුවම එයා තෝරගෙන හිටියේ ලයනල් ප්‍රේමසිරි හේතුව එයාගේ අම්මට ඇස් කණ්ණාඩි දෙකක් දීම සහ මැතිවරණ ප්‍රචණ්ඩ ක්‍රියාවලින් තොරව ඉතා නිහතමානී සහ අහිංසක ඡන්ද සටනක් දියත් කිරීම.
මගේ ගේ ඉස්සරහ පාරේ ගිය තරැණියන් දෙදෙනෙක් දවසක් කථා කර කර ගියේ මනුෂ නානායක්කාර හරිම හැන්ඩ්සම් ඒ නිසා එයාටනම් ඡන්දයක් දෙන්නම ඕන කියලා.
මගේ තවත් යාළුවෙක් ඉන්නවා. ජනාධිපතිවරණයේදී ෆොන්සේකාට ඡන්දය දුන්නා කියමින් යන කෙනෙක්. එයා මේ පාරත් කියන්නේ ගාල්ලෙන් පාර්ලිමේන්තුවට කුසලානෙන් එක්කෙනෙක් හරි යවන්න ඕන නිසා එයා කුසලානයට ඡන්දය දෙනවා කියලා. ඒත් මමයි ඔහුයි පමණයි දන්නේ ඔහුට ජාතික හැදුනුම්පතක් හෝ තාවකාලික හැදුනුම්පතක් හෝ නොමැති නිසා ඡන්දය ප්‍රකාශ කිරීමේ අයිතියක් නැති බව.
මගේ මාධ්‍ය සගයෙක් පසුගිය ජනාධිපතිවරණයේදී තමන් ලේඛකයකු ලෙස ජනාධිපති මහින්ද රාජපක්ෂට සහ පලකරමින් පුවත් පත් දැන්වීමක නම සදහන් කර තිබුණා. අන්තිමේදි ප්‍රතිඵලය වුනේ මේ පත්තරකාරයාට තමන්ගේ පත්තර රස්සාවේදී මැතිවරණ ගැන ලියන්නට නොහැකිවීම.
මේ අතරේ මට අපේ ගෙවල් ගාව කාන්තාවක් අපූරැ කතාවක් කිව්වා. එයා මේ කථාව මට කියන්න ඉස්සෙල්ලා එතන හිටියා කුසලානයේ ආධාරකරැවෙක්. ඔහු ඉන්නතුරු කුසලානයට ඡන්දය දෙන බව කියපු මේ කාන්තාව ඔහු එතැනින් නික්ම ගිය වහාම කිව්වේ. අනේ මහත්තයෝ ඡන්ද කොලේ අලිය ඉන්නවා දැක්කම මොන කුසලානද අලියටම තමයි අත යන්නේ.
ඉතින් මේ වගේ සිදුවිම් තවත් තියෙනවා. මැතිවරණ ප්‍රතිඵල එළියට එනතුරැම මේ ගැන ලියන්නම්. අදට මේ ඇති. ලිපිය දිග වුණොත් කට්ටියට කියවන්නත් එපා වෙනවග ඉතිරිය හෙට

මළවුන්ටත් නිගා දෙන කරාපිටිය රෝහල

2010-04-03T18:02:00.004+05:30

මම කරාපිටිය රෝහල ගැන ඊයේත් සටහනක් තැබුවා. මේ එහි තවත් පැතිකඩක්. පුද්ගලයෙක් මියගියහම අපේ රටේ හදුන්වන්නේ අවමංගල්‍යය කියලා. මරණයත් මංගල්‍යයක් සේ උත්සවාකාරයෙන්, අති ගෞරවනීය ලෙස සළකන්න අපේ මිනිස්සු පුරුදු වෙලා හිටියා. සුද්දා අපිට හදුන්වා දීපු නීතිය අනුවත් මැරුණු පුද්ගලයකුට ගෞරවනීය තත්ත්වයක් ලැබිය යුතුයි.
කරාපිටිය රෝහලේ කෙනෙක් මියගිය විට ඔහු හෝ ඇය ගේ සිරුර මෘත ශරීරාගාරයට ගෙනගොස් දමනවා. මේ මෘත ශරීරාගාරයේ මළ සිරුරු 24 ක් තැන්පත් කළ හැකි ආකාරයට අධිශීතකරණ හතරක් තිබෙනවා. මේ එකක උෂ්ණත්වය සෙල්සියස් අංශක හතරක් විය යුතුයි.
නමුත් දැනට කාලෙකට ඉස්සෙල්ලා මේ එකක් අක්‍රිය වුනා. ඒක හැදුවේ නැහැ. දෙවැනි එකත් අක්‍රියයි. ඒකත් හැදුවේ නැහැ. ඒ දෙකේම දැමිය යුතු මළ සිරුරු එකපිට එක තියලා අනෙක් දෙකට දැම්මා. දැන් මේවා වෙනදාට වඩා අමාරුවෙන් වැඩකරන්න වෙනවා. ඉතින් තවත් එකක් කැඩුණා. කරාපිටිය රෝහලේ පාලන අධිකාරියේ ප්‍රධානියා වන අධ්‍යක්ෂිකා වෛද්‍ය ප්‍රියානි සේනාධීර මහත්මියට මේ ගැන කියා තිබුණත් පලක් වුණේ නැහැ. ටික දවසකින් අධි ශීතකරණ හතරම කැඩිලා. මළ සිරුරු 18ක් තිබියදී. දැන් ඒ එක අධිශීතකරණයක උෂ්ණත්වය අංශක 40 ක්. මළ සිරුරු පණුවෝ හැදිලා. කරාපිටියේ මෝචරිය එහෙමත් නැත්නම් මෘත ශරීරාගාරය පැත්තේ කාටවත්ම යන්න හැකියාවක් නැහැ. පළාතම ගද ගහනවා. ඒ විතරක් නෙවෙයි අර මළ සිරුරු කුණු වෙනවා. පණුවෝ මෘත ශරීරාගාරයේ බිම විතරක් නෙවෙයි බිත්ති දිගේත් දුවනවා. ඒක තනිකරම අපායක්.
මේක දැනගත්තු ගමන්ම මම ගියා. ගිහින් ඒ සියල්ල ඡායාරූප ගත්තා. වීඩියෝ කළා. වීඩියෝ පටය සිරසටත්, ඡායාරූප ලංකාදීපයටත් යැව්වා.
පුවතක් සමබර වෙන්න ඕන නිසා මම අධ්‍යක්ෂතුමියගෙන් විමසුවා. ඇය වැඩ ගොඩක් තියෙනවා කියලා මග ඇරලා සේවකයන්ට බැන වැදිලා අන්න සිරසෙන් ඇවිත් වීඩියෝ කරලා පුළුවන් තරම් ඉක්මනට සුද්ද කරන්න කියලා. පසුවදා සුද්ද කරන්න පටන් ගත්තා. එදා එතුමියට මම දුරකථන ඇමතුමක් දුන්නම කිව්වා සතියකට ඉස්සෙල්ලා කැඩිල තිබුණා. පණුවොනම් හිටියේ නැහැ. ඒත් දැන් ඒක හදලා කියලා. අපි මේ සිදුවීම සිරස ටී.වී. ඔස්සේ ප්‍රචාරය කළා. රෑ ඒ පුවත දැකපු අධ්‍යක්ෂතුමිය පසුවදා උදේ පාන්දරින්ම ඇවිත් වේලාසනින්ම රතු ඉර ගහලා තියෙනවා. ඒ අපිට තොරතුරු දෙන සේවකයන්ගෙන් පළිගන්නලු. කමක් නෑ කොහොම හරි මෝචරිය සුද්ද කළානේ. ඒත් මේ පාලනය කරාපිටිය රෝහලට ගැලපෙනවාද කියන එකනම් ලොකු ප්‍රශ්නයක්
මේ ඡායාරූප වලින් දැක්වෙන්නේ මෝචරිය, එහි ශීතකරණ, ඒවා ඇතලේ පණුවන් හැදී තිබෙන නරක්වූ මළ සිරුරු සහ පණුවන් බිම පවා සිටින ආකාරය. ඒ වගේම අපේ සහෘදයන්ගේ ඉල්ලීම නිසා ඔන්න මම කරාපිටිය රෝහලේ අධ්‍යක්ෂිකා ප්‍රියානි සේනාධීර මහත්මියගෙත් ඡායාරූපයක් මෙහි පලකරනවා. ඒ රෝහලේ පැවැති පිරිත් පිංකමක් වෙලාවක ගත්තු ඡායාරූපයක්

කරාපිටිය රෝහලේ අන්තනෝමතික පාලනය

2010-04-02T21:11:00.002+05:30

ගාල්ල කරාපිටියේ පිහිටි ශික්ෂණ රෝහල කියන්නේ දකුණු පළාතේම ඇති ප්‍රධානතම රෝහල බව නොරහසක්. ඒත් දැන් මේකට අළුතෙන් ආපු අධ්‍යක්ෂවරිය නිසා රෝහලට හෙනහුරා ලබල කියලා පැහැදිලියි. පහුගිය දවස්වල මේ රෝහලේ කාර්ය මණ්ඩලය එක දිගට උණ රෝගයකින් පෙළෙන්න වුණා. මේ වැඩි දෙනෙක් ඩෙංගු රෝගීන් බව පැහැදිලි වුණා.
අවසානයේ නගර සභාව කළේ රෝහල් භූමිය, වෛද්‍ය හා හෙදි නේවාසිකාගාර පරීක්ෂා කිරීම. නගර සභාවේ මහජන සෞඛ්‍ය පරීක්ෂකවරු රෝහලේ ඇති ඩෙංගු මදුරුවා බෝවන ස්ථාන රැසක් සොයාගත්තා. ඔවුන් ඒ ස්ථානවල ඡායාරූපත් ගත්තා. මේ ඡායාරූපත් ඉදිරිපත් කරමින් නගර සභාව කරාපිටිය රෝහලේ අධ්‍යක්ෂ ප්‍රියානි සේනාධීර මහත්මිය ලිඛ්තව දැනුම් දුන්නේ ඒ ස්ථාන විනාශ කිරීම හෝ පිරිසිදු කිරීම කරන ලෙසයි.
ඒ දැනුම් දිම කරල තියෙන්නේ පසුගිය මාර්තු අටවැනිදා. ඒත් ඒ ස්ථාන තවමත් තියෙන්නේ ඒ විදියටමයි. කිසිම කෙනෙක් කියන කිසිම දෙයක් අහන්න කිසිම කැමැත්තක් නැති අධ්‍යක්ෂතුමිය රෝහල ගැන මම බලාගන්නම් ඔයාලා තමුන්ගේ වැඩක් බලාගෙන ඉන්න කියලා මට කිව්වේ මාධ්‍යවේදියෙක් ලෙස මේ උද්ගතව ඇති භයානක තත්ත්වය ගැන විමසන්න ගියපු වෙලාවේ. මෙහෙම අධ්‍යක්ෂවරියක් ඉන්න කරාපිටියට සිදුවන දේ අනාගතයේදී දැකගන්න පුළුවන් වේවි ! අනේ අහිංසක රෝගීන්....................

දිරිමත් කළ මිතුරන්ගේ ඉල්ලීම ..............

2010-04-02T12:50:00.002+05:30

පසුගිය කාලයේ ඇතිවූ සිදුවීම් ගණනාවක් හේතුවෙන් මේ බ්ලොග් සටහන ලිවීම නතර කැර දැමීමට තීරණය කළෙමි. එහෙත් මගේ බ්ලොග් සටහන කියවූ සහෝදර බ්ලොග් කරැවන්ගේත් මුහුණු පොතේ මිතුරු මිතුරියන්ගේත් ඉල්ලීම නිසා නැවතත් මේ බ්ලොග් අඩවිය ලිවිය යුතුයැයි තීරණය කළෙම
ඔන්න එහෙනම් අද ඉදලා මම නැවත මේ බ්ලොග් සටහන ලියන්න පටන් ගන්නවා. ඉදිරියටත් ඔබේ සහයෝගය උදක්ම අපේක්ෂාවෙන්. දිරිමත් කළ සියළු දෙනාටම ස්තූතියි. කියවන හැමෝටමත් පින්......................

අමන රට පාලනය කරන පොලීසියේ සත්ගුණවත් ප්‍රහාරය

2010-02-11T14:24:00.008+05:30

ඊයේ. ඒ කියන්නේ 2010 පෙබරවාරි 10 වැනිදා සවස ගාල්ල නගරයේදී ජනරාල් සරත් පොන්සේකා මහතා අත්අඩංගුවට ගැනීමට එරෙහිව උද්ඝෝෂණයක් පැවැත්වෙන බව දැනගන්න ලැබුණා. මම මාධ්‍යවේදියෙක් හැටියට එතැනට ගියේ එය වාර්තා කරන්න. නමුත් උද්ඝෝෂණය විසුරැවා හරින්න පොලීසිය කටයුතු කළා. එක් වියරැ වැටුණු පොලිස් නිලධාරියෙක් තමන්ගේ නිල ඇදුම පිටින්ම ඇවිත් පොල්ලක් අරගෙන මටත් තවත් මාධ්‍යවේදීන් දෙදෙනෙකුටත් අසළ සිටි පිරිසටත් පහර දුන්නා. ඒ පහර දෙද්දී උද්ඝෝෂකයෝ හිටියේ ගාල්ල ක්‍රීඩාංගණය පැත්තේ මම හිටියේ ‍පොලීසිය පැත්තේ. මම මගේ අහලකවත් උද්ඝෝෂකයෝ හිටියේ නැහැ.
මේ පොලීසිය උද්ඝෝෂකයන්ට පහර දීලා ඔවුන් එළවලා අන්තිමේදී දෙනෝ දාහක් දෙනා ඉන්න ගාල්ල බස් නැවතුම්පොළටත් පහර දුන්නා.
මේ අමන රටේ මිනිස්සුන්ව වෙන කොහොම පාලනය කරන්න ද කියලා අපේ සත්පුරැෂ පොලිස් නිලධාරීන් හිතනවා ඇති නේද ?
ඕන්න එහෙනම් ඡායාරෑප ටිකක් බලා ගන්නකෝ. මේවා වාර්තා කිරීම අපේ අතින් සිදුවිය යුතු දෙයක්. නමුත් ඒකට ගිහින් ගුටි කන්නත් වෙනවා. ඉස්සෙල්ලාම දාන්නේ මට ගහපු නිලධාරියා‍ පොල්ලක් අතේ තියාගෙන ඉන්න හැටි. ඒක තියෙන්නේ යටින්ම ඇති ‍ඡායාරෑපය විදියට. එයාගේ අංකය සැරයන් 589-- ඉතුරැ අංක දෙකක් තියෙනවා.
කහ ඉරමත ඉන්න මිනිස්සුවගයක් පේනවා නේද. බස් නැවතුමේ හිටපු අහිංසකයන්ට කදුලු ගෑස් ගහන කොට මේ සාමාන්‍ය මිනිස්සු ඇවිත් පොලීසියට අම්ම අප්ප මතක් කරලා දුන්නා. ඒ වෙලාවේ ලේ පෙරාගෙන තුවාල වෙලා හිටපු කෙනෙකුගේ ඡායාරෑපයත් දාලා තියෙනවා. ඒ කෙනාව රෝහලට ගෙනියන්න ඉදිරිපත් වුන වෙලාවේ ඒ අයටත් කදුලු ගෑස් පාරක් වැදුනා.

සාගරයක් මැද අමන රටක් ඇත. මෙහෙම අමනකම් ලෝකෙ තවත් නැත.

2010-02-08T22:23:00.002+05:30

මේ අමන රටේ මේ වගේ බ්ලොග් එකක් ලියලා වැඩක් නැත. ඒ නිසා මෙය ලිවීම මම අද මේ මොහොතේ සිට නවතා දමමි. මෙතෙක් මගේ බ්ලොග් සටහන් බැලූ සහ එයට අදහස් දැක්වූ සියළුම අයට අනේක වාරයක් ස්තූති කරමි.

ආයුබෝවේවා මහරජා‍ණනේ !

2010-01-30T19:36:00.002+05:30

ජනාධිපති මහින්ද රාජපක්ෂ අති විශිෂ්ඨ ජයග්‍රහණයක් හිමිකැර ගත්තේය. ඔහු පරදිනු ඇතැයි මුළු රටේම කථා පැතිරෙද්දී ප්‍රධාන ප්‍රතිවාදියාට වඩා ඔහු වැඩි ඡන්ද මිලියන 1.8 ක් හිමිකැර ගත්තේය. එය සැබැවින්ම විජයග්‍රහණයකි. එමෙන්ම රටේ බහුතර ජනතාව ඔහුට කළගුණ සළකා තිබේ.
මේ ජයග්‍රහණය අතිශයින්ම වැදගත්ය. ඒ කොටි ත්‍රස්තයන් පරාජය කිරීමෙන් පසු පැවැත්වූ පළමු ජනාධිපතිවරණය ජයගැනීම නිසාම පමණක් නොවේ. මෙරට මැතිවරණ ඉතිහාසයේ රටේ නායකයකු දෙවැනි වතාවට ඡන්දය ඉල්ලද්දී ජනප්‍රියත්වයෙන් වැඩිවූ බවක් පෙන්වන එකම අවස්ථාව බැවිනි.
ජනතාව තමන්ගේ නායකයා කෙරෙහි බලාපොරොත්තු තබා තිබේ. මෙය රටක කලකින් දැකිය නොහැකි ප්‍රවණතාවයකි. මැතිවරණ ප්‍රතිඵල වෙනස් කැර ඇතැයි විරුද්ධ පක්ෂය චෝදනා කරයි. එහෙත් එවැන්නක් කළ නොහැකි බව මම හොදා කාරවම දනිමි. ඡන්ද ගණන් කිරීමේ නියෝජිතයකු ලෙස සහභාගී වී පලපුරුද්දක් ඇති මගේ අත්දැකීම අනුව එවැන්නක් කිසිසේත්ම සිදුවිය නොහැක . මේ මිලියන 1.8 ක වැඩි ඡන්ද ප්‍රමාණය ජනාධිපතිවරයාට අනිවාර්යයෙන්ම ලැබුණු ඡන්ද ප්‍රමාණයකි. එය විපක්ෂය කණගාටුවෙන් වුවද අකමැත්තෙන් වුවද පිළිගත යුතුය. ඡන්දය වෙනස් කළායැයි කියන චෝදනාව මුසාවකි. එය කළ නොහැක්කකි.
මේ වනවිට යම් රාජ්‍යයක ජනප්‍රියත්වයෙන් පිරිහෙන්නේ නැති නායකයකු සිටීනම් ඒ මහින්ද රාජපක්ෂ ජනාධිපතිවරයා පමණක්ම විය යුතුය. ජනතාව ඒ තරමටම ඔහු ගැන විශ්වාසය තබා ඇත.
ඔහුට විපක්ෂය බොහෝ චෝදනා එල්ල කරන ලදී. ඒ චෝදනා ගැන ජනතාව විශ්වාසය තබා නැත. චෝදනා කවරක් වුවද ජනාධිපතිතුමා ද තමන්ගේ ඉදිරි පාලන කාලයේදී කළ යුතු කටයුතු කිහිපයක් කරළියට පැමිණ ඇත.
ඉන් ප්‍රධාන වන්නේ සරත් ‍පොන්සේකාට රජයෙන් එල්ල කළ චෝදනා වලට නිසි දඩුවම් ලබා දීමයි .
දෙවැන්න යුද්ධයෙන් පසු තවමත් ජනතාවට පීඩනයක් වී ඇති ආර්ථික අපහසුතා වලට සහනයක් සැළසීමයි.
තෙවැන්න විපක්ෂයේ ප්‍රධාන චෝදනාව වූ දූෂණය නැති කිරීමයි.
එමෙන්ම ජනාධිපතිවරයාද පවසන පරිදි විධායක ජනාධිපති ක්‍රමය අහෝසි කිරීමයි.
තවත් ගැටළුවක් ඇත. දෙමළ ජනතාව තවමත් සිංහල ජනතාව සමග ඒකමිතියකට නොපැමිණෙන බව පැහැදිලිව පෙනෙන්නට තිබේ. දෙමළ, මුස්ලිම් ජනතාව ද දිනාගත යුතුව ඇත. මහින්ද රාජපක්ෂ යනු ශ්‍රී ලංකාවේ ජනාධිපතිවරයාය. සුළු ජාතීන්ට ද මහින්ද ජනාධිපති වරයා හැර වෙනත් නායකයන් නොසිටිය යුතුය. අප එතැනට අනිවාර්යයෙන්ම යා යුතුව ඇත.

අවසාන වශයෙන් මෙය ද කිව යුතුය. පාලකයකුගේ ක්‍රියාකලාපය ඔහුට ඉතිහාසයේ හිමි තැන තීරණය කරයි. ජනාධිපති මහින්ද රාජපක්ෂ මහතා මෙරට දේශපාලන ඉතිහාසයේ පතාක යෝධයාය. එය වචනයේ පරිසමාප්තාර්ථයෙන්ම පැහැදිලිය. ඔහු පැරදවිය හැකි ජගතෙකු නැත. එහෙත් ඔහු ලංකා ඉතිහාසයේ විශිෂ්ඨතමයා වීමට මා ඉහත කී සියල්ල සපුරාලිය යුතුව ඇත.

ජනපතිතුමනි. ඔබ පසුපස ජනතාව සිටින බව නැවතත් සනාථ කැර ඇත. ඔබට ඇති දැවන්ත ශක්තියද එයයි. ඔබට ඒ හැකියාව ඇති බව අපි දනිමු. රටට සුබ අනාගතයක් උදා කරන්නට ඔබට යෝධ බල යෝධ ශක්තිය ලැබේවා යැයි ප්‍රාර්ථනා කරමු.

මට හමුවූ අරුම පුදුම ගැහැණිය

2010-01-22T14:58:00.002+05:30

මේ කාන්තාව මට හමුවූයේ 21 වැනිදා සවස හබරාදුවේ පැවැති මහින්ද රාජපක්ෂ ජනාධිපතිවරයාට සහය දැක්වීමේ ප්‍රවෘත්ති සාකච්ඡාවකදීය. බලපිටිය ප්‍රදේශයෙන් පැමිණි ඇය තම දුක්ගැනවිල්ල ඉදිරිපත් කළාය. ඇයගේ වචන වලින්ම මම එය මෙසේ සටහන් කරමි.
ජේ.වී.පී. එකේ දැන් ඉන්න අය පක්ෂයේ ප්‍රතිපත්ති පාවා දුන්නා. 89 භීෂණ කාලේ යූ.එන්.පී. එක මගේ මල්ලිව මැරැවා මාව සිරගත කලා. මම අවුරැදු දෙකක් හිරගෙදර ඉදලා ආවේ. මේ සෝමවංශලා දැන් යූ.එන්.පී . එකත් එක්ක එකතුවුනේ තමන්ගේ වාසියට අපේ මුළු සටනම පාවා දුන්නා. විජේවීර සහෝදරයා කියපු කරපු දේ කිසිවක් මේ අය තුට්ටුවකට මායිම් කරන්නේ නැහැ. ඒ නිසා මම පක්ෂයෙන් ඉවත් වුනා. මම තීරණය කළා පක්ෂයෙන් ඉවත් වී ජනාධිපතිතුමාට සහය දක්වන්න. මේ කුමන්ත්‍රණ කාරයෝ මගේ ඡන්ද අයිතියත් නැති කරලා. අඩුම ගණනේ පක්ෂය වෙනුවෙන් තම සොහෝදරයාගේ ජීවිතය අහිමිකරගත්තු අවුරැදු දෙකක් හිරබත් කාපු මට ඡන්ද අයිතියත් නැති කරලා. මට මෙවර ඡන්දය දාන්න හැකියාවක් නැහැ. මගේ නම ඡන්ද හිමි නාමලේඛණයෙන් කපා හැරලා. ඇය මේ සියල්ල කීවේ හඩා වැළපෙමිණි.
ඇයගේ එම කථාව අවසන් වූ පසු මම පහත සදහන් ප්‍රශ්න කිහිපය ඇගෙන් ඇසුවෙමි.

ප්‍රශ්නය . ඔබ හිරෙන් නිදහස් වූ බව කීවා. පක්ෂයට කැපවූ බව කීවා ඔබ පක්ෂයෙන් ඉවත්වීමට පෙර එහි නායකත්වය සමග මේ ගැන සාකච්ඡා කළේ නැද්ද ?

පිළිතුර . මම 91 නිදහස ලබා ආ පසු පක්ෂයේ ක්‍රියාකාරීත්වයෙන් ඈත් වෙලා සිටියේ. පසුව පක්ෂයේ නායකත්වය සමග සම්බන්ධතාක් තිබුණෙ නැහැ.

ප්‍රශ්නය . ඔබගේ වෘත්තිය කුමක්ද ?

පිළිතුර . මම පෙරපාසල් ගුරැවරියක්. 2000 වර්ෂයේ විදෙස් ගතවුනා. නැවත ආවේ අවුරැදු 06 ට පසුවයි.

ප්‍රශ්නය . ඔබ නැවත පැමිණි පසු පක්ෂය සමග සම්බන්ධතාවක් තිබුණේ නැද්ද ?

පිළිතුර . ටිකක් අඩු සම්බන්ධයක් තමයි තිබුණේ.

ප්‍රශ්නය . ඒ කියන්නේ ඔබ පක්ෂයේ ක්‍රියාකාරිකයකු නොවෙයි. අද ජනතා විමුක්ති පෙරමුණේ සාමාජිකාවක් ලෙස පෙනී සිටිමින් ජනාධිපතිතුමාට සහය දක්වන බව කීවත් ඔබ 91 න් පසු පක්ෂයේ ක්‍රියාකාරිකයකු වී නැහැ.

පිළිතුර . මම පක්ෂයේ ක්‍රියාකාරී නොවුනත් පක්ෂය සමග දිගටම සිටියා.

ප්‍රශ්නය . යමකු හිතාමතාම ඔබගේ ඡන්ද අයිතිය අහිමිකැර ඇත්නම් ඒ ගැන අපටත් ‍සොයා බැලිය හැකියි. නමුත් ඔබේ චෝදනාව සාධාරණ විය යුතුයි.

පිළිතුර . ඔව් සාධාරණයි. මට ඡන්ද අයිතිනය නැති කළා.

ප්‍රශ්නය . මම ගාල්ල දිස්ත්‍රික් සහකාර මැතිවරණ කොමාසාරිස් වරයාගෙන් මේ ගැන විමසනවා. ඔබට ස්ථිර ද ඔබ මේ චෝදනාව කළත් ඔබට ඡන්දය අහිමිවී ඇත්තේ ඔබ විදේශගත වීම නිසා ඔබේ නිවැසියන් ඡන්ද හිමි නාමලේඛණයේ ඔභ විදෙස් ගතවී සිටින බව සටහන් කළ නිසා නොවන බව.

පිළිතුර . සමහර විට ඒ අය එලෙස සටහන් කරන්න ඇති කියා.

ප්‍රශ්නය . එසේනම් ඔබ කරන ලද චෝදනාව අසත්‍යයක්

පිළිතුර . ඔයාලා අපි කියන දේවල් ඔක්කොම දානවාද ?

මම . ඔබ යම් චෝදනාවක් කරනවානම් මාධ්‍යමගින් එය ප්‍රචාරය කරන්නේ එය සත්‍යනම් පමණයි.
මම කැමතියි ඔබේ සිරගත ජීවිතය ගැන ලංකාදීප දියතට ලිපිපෙලක් ලියන්න. ඔබ කැමතිනම් මට ඒ අවස්ථාව දෙන්න පුළුවන් ද ?

පිළිතුර . මම මහත්තයාගෙන් අහලා කියන්නම්.

සාකච්ඡාව එතැකින් අවසන් කැරැණි. මම නැවත නිවෙස බලා එද්දී ඇය උණවටුනේ පැවැති ජනාධිපතිවරයාගේ රැස්වීමක වේදිකාවේ සිටියාය. එහිදී ඇය පෙනී සිටියේ බලපිටිය ප්‍රදේශයේ ප්‍රාදේශීය සභාවටත් ඉන්පසුව පළාත් සභාවටත් ජනතා විමුක්ති පෙරමුණ නියෝජනය කරමින් තේරී පත්වූ මන්ත්‍රීවරියක ලෙසිනි. ඇය කියන්නේ මුසාවකි. නමුත් ඇයට ඒ සම්බන්ධයෙන් කිසිදු හිරිකිතයක් නැත.
මෙවැනි පුද්ගලයන් යොදාගෙන රගපෑම් සිදුකරමින් ඡන්දය ජයගන්නට තරම් අපේ ජනාධිපතිතුමා බංකොලොත්වී ඇතැයි ජනතාවට ඒත්තු ගියහොත් සිදුවන්නේ එතුමාට බරපතල හානියකි.

දූෂණ අනාවරණය කළාට කටඋත්තර දීමට සිදුවීම

2010-01-14T12:28:00.002+05:30

ඊයේ සවස කව්දෝ පුද්ගලයන් දෙදෙනෙක් අපේ ගෙදර ඇවිල්ලා මගේ නම කියලා කථා කළා. ‍මම එළියට ගියා විතරයි මෙන්න බොලේ මෙයාලා කියනවා අපි සී.අයි.ඩී. එකෙන්ලු. මට ඒ අය නුහුරැ නුපුරැදු අයත් නෙවෙයි. මොකද එයාලා මම යන එන තැන් කථා කරන දේවල් කියන කරන සියළුම දේ ගැන හොද සෝදිසියකින් ඉන්න බවත් මම දන්න නිසා. ඒ විතරක් නෙවෙයි දැන් සී.අයි.ඩී එකේ ගොඩක් අයව අප අදුනනවා. ඒ ඉතින් අපේ රස්සාවෙ හැටි තමයි.
මෙයාලා මට කොලයක් පෙන්නලා අහනවා මේ කොලේ සිරස ටී.වී. එකට යැව්වේ ඔයාද කියලා. මම ගත් කටටම කිව්වා ඔව් කියලා. මගෙන් කට උත්තරයක් ගන්න ඕනෑලු.
පසුගිය 12 වැනිදා රාත්‍රී 7.00 ට සිරස පුවත් විකාශනයේදී පොලිස්පති තුමාගෙන් මාධ්‍යවේදියෙක් ප්‍රශ්න කළා ඔබ සියළු දෙනාම දකින්න ඇති. ඒ ඇහුවේ ගාල්ලේ පොලිස් අධිකාරී කාර්යාලයෙන් සියළුම පොලිස් ස්ථානාධිපතිවරැන්ට යවා තිබුණු පැක්ස් පණිවිඩයක් ගැන. ඒ පණිවිඩයෙන් කියා තිබුණේ කළගුණ සැළකීම සදහා මහින්ද රාජපක්ෂ ජනාධිපතිතුමාට ඡන්දය දෙන්න කියලා.
මේ ලිපිය මම දැක්කේ උඩුගම පැවැති ජනරාල් සරත් පොන්සේකා ගේ රැස්වීමේදී එදා චන්ද්‍රසේන විජේසිංහ මන්ත්‍රීවරයා මේ ලිපිය ඉදිරිපත් කරමින් කථාකළා. මම ඒ මන්ත්‍රීවරයාගෙන් ලිපියේ පිටපතක් ඉල්ලාගත්තේ මේ ඉදිරිපත් කිරීමට ලිඛිත සාක්ෂියක් මාධ්‍යවේදියකු වන මට අවශ්‍ය නිසා.
මම සිරසට කැසට් පටිය යැව්වහම එහේ හිටපු නිලධාරියෙක් මට කිව්වා ඒ ලිපිය එවන්න කියලා. මම ඒක පැක්ස් කරා. ඒ ලිපිය තමයි එදා ප්‍රවෘත්ති සාකච්ඡාවේදී පොලිස්පති වරයාට ලැබුණේ. ප්‍රතිඵලය වුනේ රහස් පොලීසිය ඒ ලිපියේ තිබුණු පැක්ස් කරපු අංකය හොයාගෙන ඇවිත් මාව සොයා ගැනීම මගෙන් ඇහුවේ පොලීසියේ කාගෙන්ද මේ පැක්ස් පණිවුඩය ලැබුණේ කියලා. මම ඉතින් මට ලිපිය ලැබුණේ චන්ද්‍රසේන විජේසිංහ මන්ත්‍රීවරයාගෙන් බව කිව්වා.
ඒත් මට ප්‍රශ්නයක් තියෙනවා. කිසිම රටක මාධ්‍යවේදීන්ගෙන් තමන්ට තොරතුරැ ලැබුණේ කොහෙන්ද කියලා ප්‍රශ්න කරන සිරිතක් නැහැ. මාධ්‍ය නිදහසක් තියෙනවා. අපේ රටේ මාධ්‍ය නිදහස වලපල්ලට ගිහින් බව මේකෙන් නැවත වතාවක් තහවුරැ වෙනවා. පසුගිය දකුණු පළාත් සභා මැතිවරණය ආරම්භ වූවාට පසුව මගෙන් රහස් පොලීසිය තුන් වතාවක් ප්‍රශ්න කළා. පොලීසිය එක් වතාවක් ප්‍රශ්න කළා. මාධ්‍ය නිදහසේ උපරිමය වෙන්න ඇති ඒ.
තවත් ප්‍රශ්නයක් තියෙනවා. මාධ්‍යමගින් පොලීසියේ සිදුවූ අක්‍රමිකතාවයන් හෙළිකරාම ඒ අක්‍රමිකතා කරපු නිලධාරියාට දඩුවම් නොදී ඔහුට නීතිය ක්‍රියාත්මක නොකර ඒ හෙළිකිරීමට දායක වූ අයගෙන් ප්‍රශ්න කිරීම ගැටළුවක්.

මැතිවරණය

2010-01-04T22:36:00.002+05:30

මැතිවරණ උණුසුම දැන් හැමතැනකටම දැනෙන්නට පටන් අරගෙන. දකුණු පළාතේ මේක විශේෂයි. මෙවර ජනාධිපතිවරණයේ ප්‍රධානතම අපෙක්ෂකයන් දෙදෙනාම දකුණු පළාතේ වීම මෙයට හේතුවක් වී ඇතැයි ද සිතිය හැකියි. ඒ වගේම දැනට වැඩිම මැතිවරණ ප්‍රචණ්ඩ ක්‍රියා වැඩිම ප්‍රමාණයක් වාර්තා වී ඇත්තේ ද දකුණු පළාතෙන්.
කොහොම වුනත් ගාල්ල ගත්තොත් මැතිවරණ නීති රීති උල්ලංඝනය කිරීම නම් එළිපිටම සිදුවන බවයි පෙනෙන්නට තිබෙන්නේ.
ගාල්ල පොලීසිය ඉදිරිපිට එක්තරා අපේක්ෂකයකුගේ විශාල ප්‍රමාණයේ දැන්වීම් සවිකරලා තිබෙන ආකාරය දකින්නට පුළුවන්. මේ දැන්වීම් ගලවන්න තමන්ට කම්කරැවන් නැතැයි කියන පොලීසිය ගාල්ල දිස්ත්‍රික්කයේ ශ්‍රී ලංකා නිදහස් පක්ෂ කාර්යාලයට පොලිස් මුරකාවල් පවා යොදලා. පොලීසිය ක්‍රියාත්මක වන්නේ රජය කියන විදියට නිසා එහෙම නොකර බැරැව ඇති. ඉතින් මැතිවරණ නීති උල්ලංඝනය කරන්නේ ඒවා වළක්වන් ඉන්න නීතිය සාධාරණය ගොඩනගන්න ඉන්න පොලීසියම නිසා අපිට ඇතිවන්නේ දැඩි පිළිකුලක්. මේවා ගැන බුද්ධිමත්ව හිතලා හොද තීරණයක් ගැනීමේ අවස්ථාව අපිට ජනවාරි 26 දා උදාවෙනවා.

සුනාමියට පස් වසරයි.

2009-12-26T10:31:00.002+05:30

අදින් වසර පහකට පෙර සුනාමියෙන් ලංකාවේ මුහුදු බඩ ප්‍රදේශ විනාශ වෙලා ගියා. ඒක නපුරැ හීනයක් වගේ. මම සුනාමියට සෘජුවම හසු නොවුනත් එහි භයංකර බව අත්වින්දා. අද උදේ 9.25 ට මුළු ලංකාවම විනාඩි දෙකක් නිශ්ශබ්දව සිටිමින් සුනාමිය නැවත සිහිපත් කළා. ඒ වෙලාවේ මම හිටියේ ගාල්ල බස් නැවතුම්පොළ ඉදිරිපිට.
එදා සුනාමියට බිමට සමතලා වුණ බස්නැවතුම් පොළ අවුරැදු පහක් ගිහිල්ලවත් හදන්න අපේ නායකයන්ට හැකියාවක් ලැබුණෙ නැහැ.
බස් නැවතුම්පොළ හදනවා කියල පුරසාරම් දොඩපු එක්තරා ඇමතිවරයෙක් සුනාමියේ අවුරැදු පහ සමරන වෙලාවේ ගාල්ල සමනළ ක්‍රීඩාංගණේ සැණකෙළික් සූදානම් කරලා. ගාලු සමය කියල ඒකට කිව්වට අපිනම් කියන්නේ ගාලු සමයම කියලා. සුනාමියෙන් මියගියපු අය සමරන්න සිදුවූ විනාශය සමරන්න කරන සැණකෙළියක්.
ඒ සම්බන්ධයෙන් අද අපූරැ වැඩක් වුණා. මේ ඇමතිවරයා කවදාවත් ගාල්ලේ ඉන්න මාධ්‍යවේදීන්ට තමන්ගේ වැඩ කිසිවක් කියන්නේ නැහ. වලව්වට අනිත් අය ගැලපෙන්නේ නැති නිසා වෙන්න ඇති. එත් අද සුනාමි නිසා කොළඹින් ලොකු ලොකු මාධ්‍යවේදීන් ගෙන්නව ගන්න බැරැව ඊයේ රාත්‍රී අපේ අයට දුරකථනයෙන් දැනුම් දීලා. ඒ කියල තියෙන්නෙත් තෝරාගත්තු කිහිප දෙනෙකුට විතරයි.
අපි සාමූහික තීරණයකට එළඹුනා. කිසිම මාධ්‍යවේදියෙක් ගාලු සමයමට ගියේ නැහැ. කවුරැ හරි ගියානම් ඒ ඉතින් ......................................... අමුතුවෙන් කියන්න ඕන නැහැනේ.
සුනාමියට පස් වසරක් සම්පූර්ණ වුණු වෙලාවේ ගාල්ල නගරය නිශ්ශබ්ද වුණු හැටි දැක්වෙන ඡායාරෑපයක් තමයි මේකේ පල කළේ.

ජනරාල්ට විරෝධයක්

2009-12-25T15:14:00.002+05:30

අද හරිම මහන්සි දවසක්. සුනාමි සංවත්සර දිනය හෙටට යෙදී තිබෙන නිසා පත්තරේට ඒකට අදාලව ලිපි කිහිපයක්ම ලිව්වා. ගාල්ල සුනාමියෙන් විනාශ වුනේ අපේ ඇස් පනා පිටම. ඒත් අපේ දේශපාලකයන්ට සුනාමියට වැනසීගියපු ගාල්ල නගරය හදාගන්න තාමත් බැරිවුනා. ලිපිය ලියනකොට තමයි මේ ගැන ඇත්තටම දුක හිතුනේ. මොනව කරන්නද ?
මහ දවාලේ තවත් වැඩක් තිබුණා. ගාල්ල කරාපිටිය රෝහල ඉදිරිපිට විරෝධතාවක්. ප්‍රදේශයේ දේශපාලන බලවතෙක් මෙය සංවිධානය කළේ. හේතුව ජනරාල් සරත් පොන්සේකා කළායැයි කියන ප්‍රකාශය. ජනරාල් එවැනි ප්‍රකාශයක් නොකළ බව කියාසිටියා. තමන් ජනරාල්ගේ ප්‍රකාශය පුවත් පතේ සටහන් කළේ වැරදීමකින් බවත් එය කරැණු තෝරාබේරා ගැනීමකින් තොරව සිදුවූවක් බවත් සන්ඩේ ලීඩර් පුවත් පත පසුව තම මුල්පිටුවේම සටහන් කර තිබුණා. නමුත් ආණ්ඩුව දැන් ඒක කියන්නේ නැහැ. වෙනදා රජය කැලෑ පත්තරයක් යැයි කියපු සන්ඩේ ලිඩර් පත්තරේ තිබුණු කතාවක් උපුටා ගනිමින් තමන්ගේ ඡන්ද ව්‍යාපාරය කරගෙන යනවා යස අපූරුවට.
ඒත් අපිට ආරංචි විදියටනම් ඒ පත්තරේ නිවැරදි කිරීම ජාත්‍යන්තරයට පෙන්වා දීල තියෙන්නේ මේ ආණ්ඩුවමයි. රටේ මිනිස්සුන්ට කියන්නේ වෙන කතාවක්. මේක තනිකර දේශපාලන බංකොලොත්බව කියලයි මට හිතෙන්නේ.
රෝහලක් ලග වාහනයක නලාව නාදකිරීමත් තහනම් නමුත් මේ අය ශබ්ද විකාශන යන්ත්‍ර දාගෙන උද්ඝෝෂණය කළා. සංවිධානය කරපු අයනම් කිව්වේ දහසක් විතර මේකට ඇවිත් හිටියා කියලා. නමුත් මම සියළුම දෙනාව ගණන් කළා. පැමිණ සිටියේ හරියටම 186 යි. එයින් 20 ක් විතර සංවිධායකයෝ. තවත් 15ක් විතර ප්‍රාදේශීය දේශපලාකයෝ. ඉතින් හිතාගන්න පුළුවන්නේ.
මේක මහ විහිළුවක්
මගේ ඡන්දය දෙන්නේ කාටද කියලා නැවත නැවතත් සිතා බැලිය යුතුයැයි මම තීරණය කළා.

යුද්දෙට ගිය සෙබළා

2009-12-09T20:27:00.002+05:30

මට හදිසියේම වැලි ඔය යන්න අවස්ථාවක් ලැබුණා. මම හිතුවෙ මේ ගමන අවසර ඇතිව යන ගමනක් කියලා. නමුත් අපිට නිසි අවසරයක් තිබුණෙ නැහැ. ඒ නිසා ගියපු වැඩේ අතරමග දාලා නැවත ආපසු එන්න සිද්ද වුනා. මේ එද්දී අපූරැ සෙබළෙක් හමුවුණා.
මම ඔහු ගැන සටහනක් තැබිය යුතුමයි. ඔහු ශ්‍රී ලංකා හමුදාවේ එක් සෙබළෙක් පමණක් වුවත් යුද්ධයට මුහුණ දීපු සමස්ථ සෙබළුන්ගේ කථාන්තරයෙන් කොටසක් ඔහු මා සමග කියා සිටියා.
මට ඔහු හමුවන විට ඔහු සිටියේ ඉතාමත්ම සතුටින්. මාත් එක්ක ඔහු කථාවට වැටුණා. මම ඇහුවා ගම් පළාත කොහේද කියලා. අනුරාධපුරයේ දුෂ්කර ගම්මානයක්. නමුත් තවත් දවස් පහකින් ඔහුගේ පදිංචිය වැලි ඔයලු. මම ඇහුවා ඇයි කියලා. ඔහු කියපු කථාවට මට ඇඩුණේ නැහැ. ඒත් ඒක අඩන්න හිතෙන කථාවක්.
මම ඔහුගේම වචන වලින් කියන්නම්.
මම දැන් හමුදාවට බැදිලා අවුරැදු අටක් වෙනවා. මේ අවුරැදු අටෙන් වැඩිම කාලයක් හිටියේ යුද බිමේ. මම යාළු වෙලා කසාද බැන්දා. වතාවක් මම තුවාල වුනා. මට වෙඩි වැදෙන කොට මගේ නෝනට ළමයෙක් ලැබෙන්න හිටියා. එයා ගොඩක් බය වුනා. මට සිහිය එන කොට එයා මගේ ලග හිටියා. ඒත් එයාගේ හිතට ආපු බය නිසාම එයා ලෙඩෙක් වෙලා. සැරින් සැරේට බලාගත්තු අතේ බලාගෙන ඉන්නවා. අන්තිමේද මගේ පුතා මන්ද මානසික ලමයෙක් වුනා. දොස්තරලා කිහිපදෙනෙකුටම පෙන්නුවා. හැමෝම කිව්වේ නෝනා ගොඩක් බය වෙච්ච නිසා එහෙම වෙන්න ඇති කියලා.
මම ආපහු යුද්දෙට ගියා. ඒ ළමය ලොකු වෙද්දී අපිට දෙවැනි දරැවා ලැබුණා. එයා හොදින් ඉන්නවා. ඒත් නෝනා යුද්දෙට හරිම බයයි. එයා නිතර නිතර ලෙඩ වෙන්න ගත්තා. දැන් දොස්තරල කියනවා එයාට සැරින් සැරේට පිස්සු හැදෙනවා කියලා.
මම මාස ගාණක් යුද්ධ කරද්දී එයා දරැ‍වො දෙන්නා එක්ක ගෙදර තනියම. දැන් යුද්දෙ ඉවර නිසා මම මේ පැත්තේ පොඩි ගෙයක් කුලියට ගත්තා. දැන් මට මගේ නෝනයි දරැවො දෙන්නයි මෙහේ එක්කගෙන එන්න පුළුවන්.
මට මුළින්ම වෙඩි වැදුණු වෙලාවේ මම හමුදාවෙන් ඉල්ලුවා මට ගෙවල් පැත්තට මාරැවක් දෙන්න කියලා. ඊට පස්සේ නෝනා ලෙඩ වුනාම මාරැවක් ඉල්ලුවා. ඒත් ඒ කිසිම ඉල්ලීමක් පලක් වුනේ නැහැ. මේක අපි ලබා උපන් හැටි වෙන්න ඇති.
අපි දුප්පත් කම නිසා හමුදාවට ආවේ. ඒත් යුද්දෙ කරන කොටනම් රට වෙනුවෙන් මැරෙන්න වුනත් සූදානමින් හිටියේ. අන්තිමේදී අපිට ඉතිරිවෙන්නේ දුක විතරයි.

මම මේ ගැන මගේ අදහස් කිසිවක් නොකියමි. අදහස් ප්‍රකාශ කිරීම ඔබට භාරයි.

මැතිවරණ නිරීක්ෂකයන්ගේ මහා බොරැව

2009-10-03T23:15:00.002+05:30

මැතිවරණ සමයේ ඡන්ද නීති උල්ලංඝනය කිරීම සම්බන්ධයෙන් අපි දැඩි සේ විරෝධතාව ප්‍රකාශ කරන්නෙමු. මේ සදහා පසුගියදා එක්තරා ස්වාධීන මැතිවරණ නිරීක්ෂණ සංවිධානයක් මාධ්‍ය සාකච්ඡාවක් පැවැත්වූයේ කොළඹදීය. එහි ගිය මාධ්‍යවේදීන්ට මෙහි දැක්වෙන ඡායාරෑපය ද ලැබුණි. එම ඡායාරූපය පෙන්වමින් එම සංවිධානයේ ලොක්කෙක් කියා සිටියේ ගාල්ල දිස්ත්‍රික්කයේ තේරීම් භාර නිලධාරී වරයා සහ සහකාර මැතිවරණ කොමසාරිස් වරයා තමන්ගේ කාර්යාලය ඉදිරිපිට වැටෙහි අපේක්ෂකයන්ගේ ඡායාරූප එල්ලාගෙන මැතිවරණ කටයුතු කරන බවයි. මෙය දැඩි චෝදනාවකි. එසේ කරනවානම් ඔවුන්ට නිසි දඩුවම් දිය යුතුය. ඒ නිසා මෙය කොළඹ දී සාකච්ඡාවට සහභාගිවූ මාධ්‍යවේදීනට අපූරු පුවතක් විය.
මම ගාල්ලේ උපන්නෙමි. ජීවත් වන්නේද ගාල්ලේය. මාධ්‍යවේදියකු ලෙස කටයුතු කරන බැවින් දිනපතා ගාල්ල නගරයට පැමිණෙන අතර බොහෝ අවස්ථා වලදී දිස්ත්‍රික් ලේකම් කාර්යාලට අසළින් ගමන් කරන්නෙමි. මම දිනපතාම මේ ගොඩනැගිල්ල දකින්නෙක්මි.
මේ ඡායාරූපය බැලූ බැල්මට පෙනෙන්නේ අර මැතිවරණ නිරීක්ෂණ සංවිධානයේ ලොක්කා කී කතාව සත්‍යයක් බවයි. නමුත් හොදින් බලන්න. දිස්ත්‍රික් ලේකම් කාර්යාලයේ ඡායාරූපයක් ඇත. එහි බිත්තියේ වර්ණය රෝස පැහැයෙන් පෙනේ. ඒ ඉදිරිපිට වැටක් ද තිබේ. ඒ වැටෙහි ඇති කණු කළු ගලින් නිර්මිතයි නේද ?
දෙවැනි ඡායාරූපය බලන්න. හොදින් බලන්න එහි ද දිස්ත්‍රික් ලේකම් කාර්යාලයේ මෙන් වැටක් තිබේ. නමුත් පසුපසින් පෙනෙන ගොඩනැගිල්ලේ කොටස සුදු පැහැතියි නේද ? දිස්ත්‍රික් ලේකම් කාර්යාලයේ ඇති රෝස පාට බිත්තිය මෙහි සුදු පැහැය ගත්තේ කෙසේද ?
දෙවැනි ගැටළුවනම් දිස්ත්‍රික් ලේකම් කාර්යාලයේ වැටෙහි තැන තැන ඇති තාප්ප කොටස කළු ගලින් නිර්මාණය වී තිබීමයි. නමුත් පුවරැව සහිත ස්ථානයේ වැටෙහි ඇති කණු කහ පැහැති තීන්ත ආලේප කර ඇත. කළු ගලින් නිර්මාණය කළ තාප්පය කහ පැහැති වූයේ කෙසේද ?
මෙයට පිළිතුරු ඔබට නැතුවා විය හැකියි. නමුත් එයට පිළිතුර මා සතුව තිබේ.
ගාල්ල ගැන නොදන්නා අයට මෙය අරුමයක් වුවද අපට එය අරුමයක් නොවේ. දිස්ත්‍රික් ලේකම් කාර්යාලයේ ගොඩනැගිල්ල පෙන්නා මේ මැතිවරණ නිරීක්ෂකයෝ පෙන්වන පුවරුවේ ඡායාරූපය ගෙන ඇත්තේ ගාල්ල ජාත්‍යන්ත ක්‍රික‍ට් ක්‍රීඩාංගණයේ ක්‍රීඩාගාරය ඉදිරිපිටදීය. මේ එතැන සවිකර තිබූ මැතිවරණ ප්‍රචාරක පුවරැවකි.
නමුත් මේ ඊනියා මැතිවරණ නිරීක්ෂකයෝ මාධ්‍යවේදීන් ද නොමග යවමින් පවසන කරුණු කොතරම් බරපතලද ? මොවුන් ට දිය යුතු දඩුවම කුමක් ද ?
නමුත් එකක් නම් කිව යුතුව ඇත. දකුණේ ඡන්දය එකම පක්ෂයේ අය පවා මරා ගන්නා අන්ත දූෂිත මැතිවරණයක් බවට පත්ව තිබේ.......................................

දෙවැනි බුදුන් අමතක කර වැනසීම

2009-08-12T20:07:00.002+05:30

අපි හැමෝම අපේ රටට දෙවැනි බුදුන් හැටියට සලකන්නේ මිහිදු හිමියන්. මිහිදු හිමියන් වැඩ වාසය කරපු තැන් අදත් අපේ අය වන්දනාමාන කරන්නේ මහත් භක්තියකින්. ඒ අතරින් මිහින්තලය පූජා භූමිය ප්‍රධාන වෙනවා. මිහින්තලේ මිහිදු ගුහාව කියන්නේ මිහිදු හිමියන් මෙරටට වැඩම කරලා වැඩ වාසය කරපු ගල්ලෙනක්. එය ඉතාමත්ම කුඩා ස්ථායනයක් වුනත් අපූරු සුන්දර තැනක්. එතැන ගලේම ‍සකස් කරපු සයනයක් තිබෙනවා. එය අවුරැදු දහස් ගණනක් පැවැතියා. නමුත් පසුගිය දිනක එතැනට ගියපු නිදන් හොරු මේ ගල් සයනයේ වටේට තිබුණු ගෝලාකාර කැටයම බිද දමලා නිදන් සොයලා. මේක දැනගත්තාම විශාල දුකක් ඇතිවුනා.
මේ ඡායාරෑපයේ තියෙන්නේ ඒ විනාශ කරපු ගල් සයනයේ අදාල ගෝලාකාර කැටයම් හතරෙන් එකක්. මේක ගත්තේ පසුගිය ඇසළ පුන් පොහෝ දිනයේදී.

අපේ භූමියේ නියම උරැමක්කාර‍යෝ (වැද්දෝ)

2009-08-11T19:30:00.003+05:30

විදෙස් විශ්ව විද්‍යාලයක මහාචාර්යවරු කණ්ඩායමක් වරක් මෙරටට පැමිණ විශේෂ පරීක්ෂණයක් කළා. ඒ මෙරටින් හමුවන ප්‍රාග් ඓතිහාසික මානවයා සහ නූතන සිංහල ජනතාව අතර පරිනාමික බන්ධුතාව සොයා ගැනීම. ඒ වගේම ඔවුන් දෙමළ ජනතාවත්, මුසිල්ම් ජනතාවත් මේ පැරණි මානවයාට සමානදැයි සොයා බැලුවා. අවසාන ප්‍රතිඵලය වුනේ අපි කිසිවකුත් මෙරට සිටි ප්‍රාග් ඓතිහාසික මානවයා සමග පරිනාමිකව සම්බන්ධ නැති බව අනාවරණය වීමයි. නමුත් වර්තමාන වැදි ජනතාව අතීත මානවයා සමග විශාල නෑදෑකමක් තිබෙන බව තහවුරු වුනා. එහෙනම් අද නොදියුණු එහෙමත් නැත්නම් ගෝත්‍රික කියල හදුන්වන මේ ජනකොටස අපේ ශ්‍රී ලංකාවේ නියම උරුමක්කරුවන්.
‍මම මේක සිහිපත් කළේ පසුගිය 09 වැනිදා ලෝක ආදිවාසී දිනය යෙදී තිබුණු නිසා. නමුත් රජයවත් වෙනත් වගකිවයුතු අයකුවත් එදා මොවුන් ගැන අවධානය යොමු කළේ නැහැ. අද වැදි ජනතාවට තමන්ගේ පාරම්පරික දඩබිම් අහිමිවෙලා. දුනු හී තළ වෙනුවට උදැල්ල පුරුදු කරපු වැද්දෝ දැන් නූතන සමාජයේ නන්නත්තාර වෙලා. වැදි ජනතාව බලන්නට එන දහස් ගණනක් සංචාරකයන් නිසාත් ඔවුන්ගේ සාමාන්‍ය දිවි පෙවතට බාධා එල්ල වෙලා. වෙනද නටපු කිරි කොරහ අද වන විට ප්‍රසංග වේදිකාවට ගෙනියන්න වැද්දෝ කටයුතු කරලා. ඒක සංස්කෘතිකයම වශයේ ගැටලුවක් ද කියලා මම දන්නේ නැහැ.
ඒත් අපි දැකපු දෙයක් ගැන සටහන් නොකර බැහැ. වැදි ගම්මානයට ගියහම දකින්න තිබෙනවා. වැදි කාන්තාවන් විවිධ නිශ්පාදන කරන ආකාරය. ඔවුන් මල් බදුන් සකස් කරනවා. මී පැණි විකුණනවා. දුනු හී තල පවා විකුණන්න තිබෙනවා. මේ සදහා යම් අතහිත දීමක් සිදුවුවහොත් වැදි ජනතාවට යම් කිසි ආකාරයකින් තමන්ගේ ආර්ථිකය ගොඩනගා ගන්න හැකිවේවි කියලානම් හිතෙනවා.
ඒත් වැදි ගම්මානයක කරපු සංචාරයේදී අහන්න ලැබුණු දෙයක් තමයි. අක්ෂර මාලාවක් නැති ඉතා සරල ඒ වගේම ඔවුන්ටම පමණක් ආවේණික භාෂාව වැදි දරුවන්ට පාසලේදී ඉගෙන ගන්න නොලැබෙන බව. ඒ නිසාම හැමදාමත් වැද්දන්යැයි හංවඩු ගැසෙන මේ දරුවෝ ටික දිනකින් පාසල් ජීවිතයට ආයුබෝවන් කියනවා.
මම කියන්නේ නැහැ වැද්දෝ හැමදාමත් වැද්දෝ විදියට ඉන්න ඕන කියලා. ඒත් වැද්දන් සතුව තියෙන පාරම්පරික දැනුම. ගතිසිරිත් සංස්කෘතික ලක්ෂණයන් සියල්ල අනාගත පරපුර වෙනුවෙන් හෝ ඉතිරි කරගන්න අපේ පාලකයෝ කටයුතු කළ යුතුයි. මේ සදහා විධිමත් වැඩ පිළිවෙලක් අවශ්‍යයි. එහෙම වුනොත් අපේ රටේ පාරම්පරික උරැම කරැවන්ගේ උරුමය ආරක්ෂා වේවි. නැත්නම් ඒ ටික දෙනක් අපිත් එක්කම විනාශ වෙලා යාවි.

පිරමීඩ ජාවාරම

2009-03-18T16:28:00.002+05:30

මේ ලගදි දවසක් මට යාළුවෙක් පොඩි වැඩකට කථා කලා. එයාගේ අක්කගේ යාළුවෝ වගයක් පුංචි ව්‍යාපාරයක් ගැන කතා කරන්න එනවලු මටත් වාසියක් වේවි කියලා එන්න කිව්වා. ඉතින් මමත් ගියා. යනකොටත් මට මේ ගැන ලොකු සැකයක් තිබුණා.
මේ අය ඇවිත් තිබුණේ සුඛෝපභෝගී වාහනයකින්.
ඉතින් එයාලා අපිට පැය තුනක දේශනයක් කළා. ඒ දේශනයේදී භාණ්ඩ අළෙවි කිරීම සදහා ප්‍රචාරක කටයුතු වලට වියදම් කරන හැටි කියා දුන්නා. මේ අය මුලුමනින්ම දේශීය ආයතනයක් කියලත් කිව්වා. පටන් අරගෙන වසරක් යද්දී බිලියන ගානක භාණ්ඩාගාර බිල්පත් ලබාගත් බවත් කිව්වා. අපි අහගෙන හිටියා. ඊට පස්සේ කියනවා එයාලගේ භාණ්ඩ මිලදී ගෙන කෝටිපතියෙක් වෙන්න පුළුවන් කියලා. හැම සතියකම රැපියල් 50000 ක් බැගින් අපේ ගිනුමකට බැර කරනවාලු. පුදුම රසවත් කතාවක්.
අපි එයාලගෙන් 0.5 ක අගයක් ඇති භාණ්ඩයක් මිලදී ගත යුතුයි. ඒ භාණ්ඩයේ සාමාන්‍ය වටිනාකම රැපියල් 50,000 ක් වෙනවා. ඊට පස්සේ අපි අපේ හිතවත්ම මිතුරන් දෙදෙනෙක් මේ සමග සම්බන්ධ කළ යුතුයි. ඒ අයත් අර භාණ්ඩ දෙකක් මිලදී ගත්තොත් අපේ ගිනුමට රැපියල් 5000 ක් බැර වෙනවා. ඔය විදියට යාළුවන් යාළුවන් එකතු කිරීමෙන් තවත් අපූරැ පිරමීඩ ක්‍රමයක් නිර්මාණය වෙනවා. මේකට එකතු වෙන්න මාත් එක්ක හිටපු කිහිප දෙනෙක්ම තීරණයක කළා. මගේ යාළුවාගේ අක්කත් ඒකට දැනටමත් එකතුවෙලා තියෙනවා. ඉතින් මම මෙයාලගෙන් හරස් ප්‍රශ්න අහනකොට මේ අය මට අභියෝග කළා මේක පිරමීඩ ජාවාරමක් නෙවෙයි කියලා. තව සති කිහිපයයි. මම ඔප්පු කර පෙන්වනවා මේක පිරමීඩ ජාවාරමක් තමයි කියලා. ඒ වගේම සමාගම් මැදුරේ ලියාපදිංචි කරල තිබුණත් මේක ලෝකය පුරා ව්‍යාප්ත වුණු ජාවාරමක් බව මට හොයාගන්න පුළුවන් වුනා.
දැන් මම ගේමට බැහැලා ඉන්නේ. ඔබ දන්න මේ ව‍ගේ තොරතුරැ මට අවශ්‍යයි.
කරැණාකර ඒ පිළිබද දැනුම් දෙන්න කියලා ඉල්ලා සිටිනවා.

කාලෙකට පස්සෙ................. ලංකාවේ හිටපු රජවරැ

2009-03-17T19:53:00.002+05:30

ගොඩක් කාලෙකින් බ්ලොග් එක පැත්තවත් බලන්න බැරි වෙලා හිටියේ.
වැඩ වැඩි නිසාම ඉතින් මේ වැඩේ මග ඇරිල ගියා.
අද පටන් ගත්තෙ මොනව හරි ලියන් ඕන කියල......... ඒත් ලියන් දෙයක් හිතා ගන්න බැහැ. ...............
....................................................................................
ඒත් මෙන්න මේක ලියන්න ඕන කියල හිතුන
‍අපි අපේ රටේ රජවරැ ගැන හිතාගෙන හිටියෙ කොයිතරම් වැරදි විදියටද කියල මේ අනුව පෙනෙන නිසා මට හිතුනා මේ ගැන සටහනක් තැබිය යුතුයි කියලා.
අපි හිතාගෙන හිටියේ ලංකාව පාලනය කළේ මහා ඒකාධිපති පාලකයෙක් කියලා........
නමුත් තත්වය ඊට වඩා බොහෝ සෙයින් වෙනස් බව මේ අනුව පැහැදිලි වෙනවා.

මහනුවර රජකරපු නරේන්ද්‍රසිංහ රජු වරක් විසූවේ පනික්කියා නම් බෙරගසන මිනිසකුට කබායක් පිරිනමා තිබෙනවා.
මෙය සම්ප්‍රදාය විරෝධීලු මෙය දුටු රම්මොලක මහ නිලමේ එම කබාය බෙරකරැ හැද සිටියදීම ඉරා දමා ඔහු සිරගත කළේලු.
අවසානයේ රජු කරපු මේ ක්‍රියාව ගැන තීරණයක් ගත් අදිකාරම ඇතුළු සෙසු ප්‍රධානීහු රජු වරදක් කළ බව තීරණය කර තිබෙනවා. අවසානයේ ඔවුන්ගේ තීරණය වී ඇත්තේ රජු ඒ සදහා දඩුවම් විදිය යුතු බවයි. ඒ අනුව රජුට දඩයක් නියම කර තිබෙවනා. එම දඩය රජු විසින් මහ දේවාලයට ගෙවිය යුතුයැයි තීරණය වූ පසු රජු විසින් එය ගෙවා දමා තිබෙනවා.

අපි හිතාගෙන හිටියේ.............. ලංකාවේ රජවරැ ගැන අපිට මවා තිබූ ප්‍රතිරෑපයේ දැක්වුණේ මෙවැනි රජවුරැ නොවෙයි ‍නේද ? අපි හිතාගෙන හිටියේ අන්තනෝමතික වැඩකරන ඒකාධිපති රජවරැ ලංකාව පාලනය කළ බවක් නේද ?

සංවාදයට විවෘතයි. ............................

අවසන් නිමේශය

2009-01-16T23:01:00.002+05:30

ගාල්ල කළුවැල්ල පන්සල පිහිටා තිබෙන්නේ නගරය මධ්‍යයේ.
මේ හරිය ඉතාමත්ම ජනාකීර්ණයි.
එක පැත්තකින් තියෙන්නේ මහ මුහුද
දවසක් මහ දවාලේ පන්සලට අමුත්තෙක් ඇතුළු වුනා. ඒ ඉදිරි දොරටුවෙන් නෙවෙයි.
පිටිපස්සේ දොරටුවෙන්.
මෙයා කෙලින්ම ගියේ නායක හාමුදුරැවෝ පෙනෙන තැනකට.
හැබැයි හාමුදුරැවොත් එක්ක කථා කලේ නැහැ.
උන්වහන්සේට පේන්න බිම දිගා වුනා.
නැගිටින්න බැහැ.
කවදාවත් පන්සලට ආවෙ නැති අළුත් අමුත්තා ගාවට හාමුදුරැවෝ ගියා.
එතකොට මෙයා ලේ පෙරාගෙන ඉන්නවා.
කව්දෝ හොදටම ගහලා.
බෙල්ල කැපිලත් තිබුණා.
ඒ නිකන් ගෝරියකට පැටළිලා නෙවෙයි.
එයාගේ මස් අනුභව කරන්න.
මේ අමුත්තා ඉත්තෑවෙක්. පොඩි එකෙක් නෙවෙයි.
හොදට වැඩුණු නිරෝගී ඉත්තෑවෙක්.
මස් වල රහ වැටුණු මිනිස්සු මරන්න එළවද්දි මේ ඉත්තෑව රිංග ගත්තේ ලගම තිබුණු පන්සලට.
හාමුදුරැවෝ මෙයාට හොදට සාත්තු කළා.
ඒත් එයාගේ ජීවිතය බේරගන්න බැරි වුනා.
විනාඩි කිහිපයක් හුස්ම අල්ලගෙන හිටපු ඒ අහිංසක අසරණ සතා මිය ගියා.

මේක ඉතා වැදගත් තැනක්.............

2009-01-15T08:36:00.004+05:30

කාටද කියන්න පුළුවන් මේ කොහේද කියලා...................
මේ ඡායාරෑප දෙක අදින් වසර 40 කට පමණ පෙර අවස්ථාවන් දෙකකදී ගත්තු ඒවා.

කැබැල්ලෑවා.......

2009-01-13T17:13:00.000+05:30

මේ පුංචි කැබැල්ලෑ පැටියා හමුවෙලා තිබුණේ කැලෑවේ ඇවිදින්න ගියපු තරැණයන් පිරිසකට. ඔවුන් දැනගෙන හිටියේ නැහැ මේ මොකෙක්ද කියලා. ඔවුන් කිසිම දිනයක කැබැල්ලෑවෙක් දැකල තිබුණේ නැහැ. මේ අමුතු සතාව ඔවුන් ගෙදර ගෙනාවා. ගෙදර හිටපු සීයා තමයි කීවේ මේ ඉන්නේ කැබැල්ලෑ පැටියෙක් කියලා. ඒකා සුදුම සුදුයි. ලොකු වෙනකොට දුඹුරැ පාට වුනත් තවමත් පොඩි එකානේ........... .
කැබැල්ලෑවෙක් නිවසක හදන්න බැහැ. ඒක නීති විරෝධී කටයුත්තක්. මේ තරැණයන් ගාල්ල වනජීවී සංරක්ෂණ සංගමයට කැබැල්ලෑ පැටියව භාර දුන්නා. දැන් කැබැල්ලෑවා කිරි බොමින් වැඩෙනවා.
කැබැල්ලෑවා සත්ත්ව විද්‍යාත්මකව හදුන්වන්නේ මානිස් ක්‍රැසිකෝඩාටා ලෙසිනි. මේ අහිංසක සත්ත්වයා මේ වනවිට වදවී යාමේ තර්ජනයට මුහුණ පා ඇති සත්ත්වයෙකුද වනවා. ඒ වගේම කැබැල්ලෑවා විශේෂ සතකු වන්නේ සිරැරේ රෝම නොමැති එකම ක්ෂීරපායී (කිරි බී වැඩෙන) සත්ත්වයාද වන නිසා.
මස් සදහා කැබැල්ලෑවා මරා දැමීම සහ වනාන්තර විනාශය නිසා ඔවුන් ඉතා නුදුරැ අනාගතයේදී ලංකාවෙන් වදවී යාමට ඉඩ තිබෙනවා.

ආසියාවේ පැරණිම නැව ශ්‍රී ලංකාවෙන්....................

2009-01-09T19:44:00.001+05:30

මීට අවුරැදු ගණනාවකට පෙර ගොඩවාය ප්‍රදේශයේ බෙල්ලන් එකතුකිරීමට කිමිදෙන දෙදෙනෙකුට මුහුදේදී අපූරැ වස්තුවක් ලැබුණා. ඒක ගල්බංකුවක්. මේකේ සළකුණක් තිබුණා. ඒකට කියන්නේ නන්දිපාද සළකුණ කියලා. මේ සළකුණ භාවිතා කළේ ක්‍රි.පූ. 300 ත් ක්‍රි.ව. 300 ත් අතර කාලයේදී.
පසුගිය දවස්වල සමුද්‍ර පුරාවිද්‍යාඥයන් කණ්ඩායමක් මේ ගල් බංකුව ලැබුණු ස්ථානයේ මුහුද ගවේෂණය කළා. පුදුමයක්. ගිලී ගිය නැවක නටඹුන් එම ස්ථානයේ දක්නට ලැබුණා. මේ නැ‍වේ නෂ්ඨාවශේෂ අතර කළු රතු මැටි බදුන් ලෙස හදුන්වන එක පැත්තක් රතු අනෙක් පැත්ත කළු පැහැති මැටි බදුන් ගොඩක් දක්නට ලැබුණා. ඒ වගේම අතීතයේ මැටි බදුන් ඔබදමන්න භාවිතා කළ ද්‍රව්‍ය රැසකුත් එම ස්ථානයේ තිබුණා.
ඒ වගේම දැඩි ලෙස දිරාගිය ලී නැවක අවශේෂ එම ස්ථානයේ තිබෙන බව පුරාවිද්‍යාඥයන් තේරැම් ගත්තා. අතීතයේ භික්ෂූන් වහන්සේලා අසුන් ගැනීමට භාවිතා කළ දෙයක් තමයි අර ගල් බංකුව. ‍ගොඩවාය පැරණි වරාය පිහිටි ස්ථානයේ සිට කිලෝ මීටර හතරක් ඈත මුහුදේ අඩි 110 ක් ගැඹුරෙන් හමුවූ මේ ගල් බංකුව, එතැන තිබූ මැටි බදුන් නිෂ්පාදනය කළ ආකාරය හා එහි ඇති අවශේෂ අනුව පුරාවිද්‍යාඥයන් නිගමනය කළේ ක්‍රිස්තු පූර්ව 300 දී පමණ ගිලී ගිය නැවක නටඹුන් තමන්ට හමුවී ඇති බවයි.
එසේනම් මේ හමුවී තිබෙන්නේ මෙතක් ලොව හමුවූ පැරණිතම නැව නොවුනත් එය අනිවාර්යයෙන්ම ආසියානු කලාපයේ දී හමුවූ ‍පැරණිතම නැව බවටනම් විවාදයක් නැහැ.
අපේ රටේ පුරාවිද්‍යාත්මක වටිනාකම ඓතිහාසික වටිනාකම ඒ අනුව සිය දහස් ගුණයකින් ඉහළ ගියා.

ලොව පැරණිම වී......... ශ්‍රී ලංකාවෙන්

2009-01-09T06:34:00.000+05:30

තිස්සමහාරාමයේ කැණීම් වලින් අපූරැ වස්තුවක් හමුවුණා.
පියනකින් වසා තිබූ මුට්ටයක්.
හුගක් දෙනෙක් හිතුවේ මෙහි කාසි ඇති කියලා.
ප්‍රවේශමෙන් උඩට අරගෙන පියන ඇරලා බලන කොට ඒක ඇතුලේ වී පුරවලා.
මේ මුට්ටිය හමුවුනේ ක්‍රිස්තු පූර්ව තුන්වැනි සියවසට අයත්යැයි කාල නිර්ණය කරපු පස්තට්ටුවකින්.
සමහර විටක පසුකාලයකදී මෙය වළලන්නට ඇති.
නමුත් මේ මුට්ටියේ තියෙන සංකේත කිහිපයක් හා මුට්ටිය සෑදූ තාක්ෂණය අනුව එය අයත් වන්නේ ක්‍රිස්තු පූර්ව තුන්වැනි සියවසට
එහෙමනම් මේ වී තොගය අදින් අවුරැදු 2300 ක් පැරණියි.
මුට්ටියට කිසිදු හානියක් සිදුවී නොමැති නිසා වී තොගය ඉතා පිරිසිදුව තිබුණා.
නමුත් වී බොල් වෙලා.
දැන් මේ සියල්ල තිබෙන්නේ ජර්මනියේ.
වැඩිදුර පරයේෂණ සදහා රැගෙන ගිහින්.
තවත් වසරකින් පමණ අපට නිවැරදි තොරතුරැ ලැබේවි.
කොහොම වුනත් මේ වී ටික ලෝකයේ පැරණිම ධාන්‍ය තොගය විය හැකියි.
මෙය වැදගත් වන්නේ අපේ අතීත මුතුන් මිත්තන්ගේ ආහාර රටාව අධ්‍යයනය කරන්න තියෙන හොදම සාක්ෂියක් නිසා

නොදන්නා කම

2009-01-09T05:54:00.000+05:30

වෛද්‍යවරැන් කරන දේ මට නොතේරේ. ඔවුන්ට ඇති ගැටළුද මට කිසිදා තේරැම්ගත නොහැක ඒ මම වෛද්‍යවරයකු නොවන නිසාවෙනි.
මිනින්දෝරැවන් කරන කියන දේ පමණක් නොව ඔවුන්ගේ ගැටළුද මට නොතේරේ ඒ මම මිනින්දෝරැවකු නොවන බවැනි.
බස් රියදුරෝ, බස් හිමියෝ හැමදාමත් කරන අරගල මම තේරැම්ගන්නේ නැත. ඒ මම එවැන්නෙකු නොවන බැවිනි.
ගුරැවරැන්ට ඇති ගැටළුද මම නොදනී. මම කිසිදා උගන්වා නැති බැවිනි.
මාධ්‍යවේදීන් වශයෙන් අපට, මට ඇති ගැටළු මෙන්ම අප කරන කියන දෑ ඔබ කිසිවෙකුත් කිසිවක් නොදනී. තේරැම් ගැනීමට ද නොහැක. ඒ ඔබ මාධ්‍යවේදියකු නොවන බැවිනි.
ඔබ දන්නේ මාධ්‍යවේදීන් ගැන, මාධ්‍යය ගැන අන් කවරකු හෝ කියන කථාවක් පමණි.

මාධ්‍ය නිදහස

2009-01-08T15:04:00.001+05:30

මම හිතාගෙන හිටියේ මේ මාධ්‍ය නිදහස ගැන කථාව ඊයේ රාත්‍රියෙන් නවතා දමන්න. ඒත් අද උදේ වරැවේ ලසන්ත විකමතුංගට වෙඩි තියලා. ඔහු කළුබෝවිල රෝහලේදී මියගියා. මේ වෙලාවේ අපිට මතක්වෙන්නේ රිචඩ් ද සොයිසා වගේ මාධ්‍ය වේදීන් ඝාතනය කරපු හැටි. දැන් තත්ත්වය ඊටත් වඩා එහා ගිහින් වගේ..........
සිරසට ගහපු වෙලාවේ මාධ්‍ය නිදහස නැති වෙනවා. නැති කරන්න හදනවා කියලා අපි කියද්දී ඒකට විරැද්ධ වුනු සහෝදරයොත් හිටියා. සමහරැ කිව්වා සිරස යූ.එන්.පී. එකත් එක්ක එකතුවෙලා කුමන්ත්‍රණයක් කරලාය කියලා. දැන් ඉතින් එයාලා මොකද කියන්නේ............. ලසන්ත වික්‍රමතුංග තමන්ටම වෙඩි තියාගන්න ඇති නේද ?

අද ලංකාදීප පත්‍තරේ ගුරැදා විග්‍රහය අවසන් කරලා තිබුණේ මෙන්න මේ විදියට
මොලර් නම් ජර්මානු ජාතික කවියා ලියපු මේ පද පේලියෙන්.............
ඔවුන් පැමිණ ක්‍රිස්තියානුවන් ඝාතනය කරන විට මම කතා නොකළෙමි.
මා ක්‍රිස්තියා‍නුවෙකු නොවන නිසා
ඔවුන් පැමිණ අසල්වැසියන් ඝාතනය කරන විට මම කතා නොකළෙමි.
ඔවුන් මාගේ නිවසට නොපැමිණි නිසා
ඔවුන් පැමිණ යුදෙව්වන් ඝාතනය කරන විට මම කතා නොකළෙමි.
මම යුදෙව්වෙකු නොවන නිසා.
ඔවුන් පැමිණ ප්‍රජාතන්ත්‍රවාදීන් ඝාතනය කරන විට මම කතා නොකළෙමි.
මා දේශපාලනය නොකරන නිසා.
ඔවුන් පැමිණ මගේ නිවසට තට්ටු කරන විට මා වෙනුවෙන් කතා කරන්න කිසි‍වෙකු නොවුණි.
ඔවුන් සියලු දෙනා ඝාතනය කොට අවසන් නිසා

විදුහල්පතිගේ අපචාරය හා නීතිය

2009-01-08T06:19:00.000+05:30

එක්තරා පාසලක විදුහල්පති වරයෙක් පිරිමි ළමයකුට අසැබි වීඩියෝ දර්ශන පෙන්වලා ඒ ළමයා ලිංගික ක්‍රියා සදහා පොළඹවාගෙන. මේක මේ ළමයා කාටදෝ කියලා දැන් වැඩේ හෙළි වෙලා. පාසලේ ගුරැවරැ සහ ළමයි සියළු දෙනාම මේ සිද්ධියට එරෙහිව නැගී සිටිනවා.
ගමේ මනුස්සයෙක් මට කථා කළා. ගුරැවරැ අධ්‍යාපන අමාත්‍යාංශයට පැමිණිලි කරන්න ගියපු වෙලාවේ මේ විදුහල්පති වරයාගේ හිතවතකුගේ බිරිදක් අමාත්‍යාංශයේ ඉදගෙන විදුහල්පති නිවැරදි බව කීවාලු. දැන් පරීක්ෂණ යට යනවාලු. ඇයගේ හයිය වැඩ කරනවාලු. මේ වෙනුවෙන් මාධ්‍ය මගින් සාධාරණය ඉටු කරන්නලු.
මම ඊයේ රෑ මේ ගමට ගියා. ළමයාගේ විස්තර සහ සිදුවීම සොයන්න.
කථාව සම්පූර්ණයෙන්ම ඇත්ත වගේ. ඒත් පැමිණිල්ල කරලා තියෙන්නේ ගුරැවරැ කිහිපදෙනෙක් අධ්‍යාපන අමාත්‍යාංශයට. ඔවුන් කියන්නේ විදුහල්පති ඉවත් කරන්න කියලා. අමාත්‍යාංශයයෙන් යැයි කියාගත් කිහිපදෙනෙක් සහ නීතීඥයෙක් ඇවිත් අර ළමයාගේ තාත්තා හමුවෙලා. විදුහල්පති ළමයාට කරදර කළායැයි ප්‍රකාශ කරන්න එපා කියලා ඉල්ලීමක් තියෙනවා.
සිදුවීමට දැන් දින හයක් වෙනවා. වෙලා තියෙන්නේ 02 දා. අවුරැදු 14 ක බාලවයස්කාර දරැවෙකුට මෙවැනි අපරාධයක් සිදුවූ විට ළගම ඇති පොලීසියට පැමිණිලි කළ යුතුයි. ඒත් දෙමව්පියන්වත් පොලීසියට ගිහින් නැහැ. දෙමව්පියන් අවශ්‍ය නැහැ ඕනෑම කෙනෙකුට පොලීසියට යන්න පුළුවන්. පොලීසියට නොගිය අපරාධයක් ගැන අපිට මාධ්‍ය මගින් හෙළිකරන්න හැකියාවක් නැහැ.
ප්‍රශ්නය තියෙන්නේ මේ ළමයාගේ තාත්තා පොලිස් කාරයෙක් වීම. ඔහු නීතිය නොදන්නවා නෙවෙයි. නමුත් ඔහු නීතිය තම අතට ගන්න සූදානමින් ඉන්නවා කියලත් මට පොඩි සැකයක් ඇති වුනා. ඒක කොහොම වුනත් වැරදි වැඩක්

උතුරේ යුධ බිම

2009-01-07T23:44:00.000+05:30

මේක මගේ නිර්මාණයක් නෙවෙයි.
නම නොදන්නා කවුරැන් හෝ විසින් සටහන් කරලා මට එවා තිබූ ඊ මේල් පණිවුඩයක්.
මට හිතුනා මෙය මෙහි සටහන් කළ යුතුයි කියලා
@@@@@@@@@@@@@@@@@@@@@@@@@@@

වන්නියේ යුධ අගල් තුල
කදු ගැසෙන යොවුන් විය මත
නියගලා මල් පි‍පෙයි
එක යායට

ඊසාන මෝසමේ බීරැමෙන්
වෙන් කෙරැණාට
උතුරේ කදුලු දකුණින්
තෙත බරිත ලේ සුවද හමනවා
වැස්සට දෙස් තියන
අහසට හූල්ලන
හාරිස්පත්තුවේ
අගුනකොළ පැලැස්සේ
බුලත්කොහුපිටියේ
අම්මලාගේ නැහැ සිදුරැ විනිවිද
ගැඹුරැ හද පතුලටම

කිලිනොච්චියේ
වර්ග කිලෝමීරටයක්
සිංහල බුක්තියට හරවන්න
යසවතීගේ කොලුවා ඇද වැටුනා
තවත් සිය ගාණක් එක්ක
ඔල්වරසන් නගන
රෑපවාහිනියවත් දන්නෑ
වැලලෙන්න බිම් අගලක් නැති වග
උපතින්ම සිංහල
ඒ කොලු ගැටවුන්ට

වගේ වගක් නැති කොළඹ
සවුදිය පුරනවා
අලුත් අවුරැද්දට
පෙන දදා උතුරද්දි කිරි මුට්ටි
කොළඹ
කිලිනොච්චියේ ගලනවා
පෙරදාක කිරිකර පෙවුන
ලේ කදුළු
සිංහල ද දෙමළ

සොයාගත නොහැකි වෙන්කර

ජීවිතේ මල්
යුද්ධෙ තියෙනකල්
දියවන්නාවට නැවුණු
වැටකෙයියා අත්තක ඉදන්
කපුටෙක් කියනවා
සිංදුවක්

සහෝදරයාගේ නිරැවත

2009-01-07T19:04:00.000+05:30

මම අද උදේ තැබූ සටහනකින් එක්තරා මාධ්‍යවේදියකු ගැන කියා සිටියා. ඔහු මොනවා කළත් අපේ සිතේ ඔහු ගැන වෛරයක් තිබුණේ නැහැ. අපි අද හවස මාධ්‍ය මර්ධනයට එරෙහිව ගාල්ල නගරයේ උද්ඝෝෂණයක යෙදී ආපසු නිවෙස් කරා යද්දී අපේ අර මාධ්‍යවේදියාගේ නිරැවත හෙළි වුනා.
ඉහත ඡායාරෑපයෙන් දක්වා ඇත්තේ ඔහු කළ වැඩක්.
යුද හමුදාවට, පොදුවේ ලබාගත් යුධමය ජයග්‍රහණ සියල්ලටම අපි සුබ පතනවා.
අපි සියළු දෙනාම කොන්දේසි විරහිතව රණවිරැවන් සමග ඉන්නවා. නමුත් මේ කරපු වැඩේ අසික්කිතයි. නින්දිතයි. චුත්තයි. (මට කියන්න වචන නැහැ)
මේ යකා අපේ සියළු මාධ්‍යවේදීන් පාවාදීලා.
මේ පුවරැවේ රණවිරැවන්ට උපහාර පිදීම ගැන අපිට ගැටළුවක් නැහැ. ඒත් ජාතික නිදහස් පෙරමුණ කියන විමල් වීරවංශගේ දේශපාලන පක්ෂයක් එක්ක එකතුවෙලා කටවුට් ගහන්න අපි මේ යකාට අවසරයක් දුන්නේ නැහැ. මූ මේ විමල්ට පාවාදීලා තියෙන්නේ මාධ්‍යවේදීන් සියළු දෙනාගේම ආත්මගරැත්වය.
මේක යට මීට වඩා පසුබිම් කථාවක් තියෙනවා.
මූ හැමදාමත් කීයක් හරි හොයාගන්නේ මාධ්‍ය පාවාදීලා කියලා අපිට සැකයක් තිබුණා.
බැනර් එකක් ගහන්න. පිකටින් එකක් කරන්න ඕන කියලා නීතීඥයන්ගෙන්, ව්‍යාපාරිකයන්ගෙන් සල්ලි කීයක් හරි ඉල්ල ගන්න තරම් නින්දිතයෙක් වුණු මේ මාධ්‍යවේදියායැයි කියා ගත්තු එකාට අපි තවදුරටත් මාධ්‍යවේදියෙක් ලෙස සලකන්නේ නැහැ.
ඒ යකා වචනයෙන් කියන්න බැරි තරම් පාහරයෙක්
අපි මේ පුවරැව දැකපු වෙලාවේ ඒ යකාගේ මාධ්‍ය සංගමයේ ලේකම් සමන් සී. ලියනගේ සහෝදරයාත් අපිත් සමග හිටියා. ඔහු මේ පුවරැව දැකලා පුදුමයට පත්වුනා. අනේ අපිනම් මෙහෙම දෙයක් දන්නේ නැහැ..... කියලා කියපු ඔහු අපි මේ යකාට විරැද්ධව වැඩ කළ යුතුයි කියලත් කිව්වා.

ජනවාරි 07 - ...................... කඩේ යාම හා නිදහස වෙනුවෙන් සටන් කිරීම

2009-01-07T08:53:00.000+05:30

හැමදාම උදේ පාන්දර සියළුම පුවත් පත් මිලදී ගෙන ඒවා කියවීම මගේ දිනචර්යාවේ කොටසක් වෙලා තිබුණේ දැන් වසර ගණනාවක සිට.
අද උදේ පත්තර ගත්තාම ඇති වුණේ ලොකු කළ කිරීමක්...............
හැම පත්තරේකම මුල් පිටුවේ තිබුණේ සිරසට එල්ලවූ ප්‍රහාරය ගැන.......
ඒත් රජයේ පත්තරවල මේ ගැන වචනයක්වත් නැහැ.
ඒකේ ඉන්නේ මාධ්‍යවේදියෝ නෙවියද කියලා ගැටළුවක් ඇතිවුනා.
ජාතික රෑපවාහිනියට එක්තරා පිරිසක් ඇවිත් පහරදීපු වෙලාවේ....
අපි පාරට බැහැලා උගුර ලේ රහ වෙනතුරැ කෑ ගැහුවේ කොන්දේසි විරහිතව මාධ්‍ය නිදහස වෙනුවෙන්......
ඒත් අද ර‍ජයේ මාධ්‍ය සිරසට එල්ල කරපු ප්‍රහාරය ගැන නිහඩයි.
මේ නිහැඩියාව කියාපන්නේ .......... මොකක්ද ?
ප්‍රහාරය එල්ලකළේ කවුද කියලා ඔවුන් නොකියා කියනවා නේද ?
මම නිකම්ම නිකම් පත්තරකාරයෙක්..........
ඒත් අපි මාධ්‍ය නිදහස වෙනුවෙන් හඩ නැගිය යුතුයි.
ජාතික රෑපවාහිනියේ සහෝදර මාධ්‍යවේදියෙකුගෙන් මේ ගැන මම ඇහුවා.......
ඔහු විරෝධතා ව්‍යාපාර වලට නම්දරපු කෙනෙක්.....
අපිත් ඔහු සමග රෑපවාහිනී ප්‍රහාරයේදී පාරට බැස්සා................
මේක ගැන මගේ පරිකල්පනාවට ආවේ නැහැ... ඒ නිසා මම විරෝධතා දක්වන්නේ නැහැ කියලා ඔහු කිව්වා.
ඒ සහෝදරයට මම නැවතත් මෙහෙම කියනවා.
කමක් නැහැ සහෝදරයා.......
ගැහුවේ කාටද ? ගැහුවේ කව්ද ? කියන එක අපිට ප්‍රශනයක් නැහැ.......
අපිට තියෙන ප්‍රශ්නය මාධ්‍ය නිදහස අහිමිවීම .....................
ආසන්නම හේතුව සිරසට එල්ලවූ ප්‍රහාරය බව අපි දන්නවා
මේක අවසන් සිදුවීම වෙන එකක් නැහැ.
සමහර විට ඉදිරි දවසක උඹේම මාධ්‍ය ආයතනයට නැවත ගහවි.
නැත්නම් උඹටම ගහවි.
එදාට අපි උඹ කියපු සියළු දේ අමතක කරලා.............
උඹ වෙනුවෙන් උඹේ මාධ්‍ය ආයතනය වෙනුවෙන් පාරට බහිනවා...... උඹ එපා කිව්වත්........
ඒ අපේ හැටි.....
අපි අපේ මාධ්‍ය නිදහස රැකගත යුතුයි.
තොරතුරැ ලබාදීමේත් ලබාගැනීමේත් අදහස් පලකිරීමේත් මානව අයිතිය නැතිකරන්න අපි ඉඩදෙන්නේ නැහැ.

ජනවාරි 06 දා - මාධ්‍ය නිදහසේ අභියෝගය

2009-01-07T08:19:00.000+05:30

ගාල්ල දිස්ත්‍රික්කය පුරා ඇති ජනතා ප්‍රශ්න කිහිපයක් මාධ්‍ය මගින් සාකච්ඡාවට භාජනය කරන්න අවශ්‍ය සැළසුම් සකස් කරලා මම 05 දා රාත්‍රී නින්දට ගියේ 06 වැනිදා උදේ දෙකට විතර. වැඩි වෙලාවක් නිදාගන්න ලැබුණෙ නැහැ. 5.30 ට විතර දුරකථන නාද වෙන්න අරගෙන නැගිට්ටේ නින්ද යන්නෙ නැති එවුන්ට හිතෙන් බැන බැන.
මචං සිරසට බෝම්බ ගහලා.......... මොකද වෙන්නේ....... කථා කරන හැමෝගෙන්ම ප්‍රශ්නයක්.....
පෝද්දල ජයන්තට කථා කලා.
මල්ලි මම එතනට යනවා ගිහින් කියන්නම්.....
1996 ඉදල මගේ ජීවිතෙත් එක්ක සමීපව තිබුණු සිරස පැය කිහිපයකට නිහඩ වෙලා.
අනේ පුතේ මල්ලි කොහොද ඉන්නෙ කියල බලන්න. එයාලට මොනව වෙලාද දන්නේ නැහැ.
අම්මා අඩන්න අරගෙන. ..........
මේ ප්‍රහාරය එල්ලවුනේ සිරස නාලිකාවටවත් එහි හිමිකරැ මහාරාජාටවත් නෙවෙයි.
සමස්ථ මාධ්‍යයට කියන එකයි මගේ අදහස.........
නිල්ලජ්ජිත, අවස්ථාවාදී දේශපාලනයක් තුල මාධ්‍ය නිදහස නැතිකරන්න අවශ්‍ය වෙලා තියෙනවා.
මේ එහි පළමු අවස්ථාව නෙවෙයි. ඒ වගේම අවසන් අවස්ථාවත් නොවන බව අපි හොදාකාරවම දන්නවා.
රජයට අවශ්‍යවෙලා තියෙන්නේ මාධ්‍ය පාලනය තමන්ගේ අතට ගන්න. අපි පොඩි කාලේ ප්‍රේමදාස ජනාධිපතිතුමාට වෛර කරා. පාසල් මාධ්‍ය අංකුර හැටියට හිටපු අපි දැක්කා මාධ්‍ය නිදහස සීමා කරන හැටි....
ඒත් දැන් හිතෙනවා............. ඒ කාලේ අදට වඩා නිදහසක් තිබුණා කියලා..............
මේවා රජය කරන දේවල් නොවෙන්න පුළුවන්............
ඒත් ප්‍රශ්නය තියෙන්නේ මාධ්‍ය නිදහස සුරැකීම රජයේ වගකීමක්..... ඔවුන් එය වටහාගෙන නැහැ.
එවන් තත්ත්වයක් තුළ වෙනත් බලවේග ක්‍රියාත්මක වෙනවා............
නැතිවෙන්නේ මාධ්‍ය නිදහස කියලා සරලව කියන්න පුළුවන් වුනත්.
එහි ගැඹුරැ දෙයක් තියෙනවා.
අදහස් ප්‍රකාශ කිරීමට හා තොරතුරැ ලබාදීමටත් ලබාගැනීමටත් අති මූලික මිනිස් අයිතිවාසිකම් අමු අමුවේ උල්ලංඝනය වනවා.
ඒ වගේම යුද්ධයක් කරන රටක (අපිත් යුද්ධයට හුරේ දානවා) මෙවන් සිදුවීම් ගැන ජාත්‍යන්තර වශයෙන් ලබාදෙන ප්‍රතිරෑපය හොද නැහැ.
මේවා රට කරවන ඇත්තන් තේරැම්ගත යුතුයි.
කොහොම උනත් මෙන්න මෙහෙමත් ප්‍රශ්නයක් තියෙනවා.
මහගෙදර වගේ වැඩසටහන්, සුපර් ස්ටාර් වගේ වැඩසටහන් වලට සමහරැ කැමැති නැහැ.
තමන් කැමති නැති ඒවා නොබල වෙන නාලිකාවක් බලන්න ඕනම කෙනෙකුට අයිතියක් තියෙනවා.
ඒකට තමයි රෑපවාහිනියේ රිමෝට් එකක් තියෙන්නේ. ඒවට කැමති අයත් ඉන්නවනේ.
ඒත් මේ වැඩසහටන් විවේචනය කරපු රජයේ මාධ්‍ය දැන් ඒවා කොපි කරන්න පටන් අරන්........
ඒ ගැනත් පොඩ්ඩක් විතර හිතන්න.........
ඒ විතරක් නෙවෙයි. ඕනම ඈත දුෂ්කර ගමකට ගිහින් පුළුවන්නම් එහේ තියෙන ප්‍රශ්නයක් කාටද කියන්න ඕන කියලා අහන්න.
මිනිස්සු කියාවි අපි මේක සිරස ට කියමු කියලා.......
ඒක තමයි අද රටේ යථාර්ථය.
පාලකයන් පිස්සු නටද්දී මිනිසුන්ගේ බලාපොරොත්තුව වෙන්නේ ජනමාධ්‍ය........ ඒකෙදී සිරසට ප්‍රධාන තැනක් හිමිවුනා.
අනිත් දේ තමයි යුද්ධය.
සිරස යුද්ධය පෙන්නන්නේ නැහැ කියනවා.
කව්ද කියන්නේ කොහොම ද කියන්නේ.......
සෑම පුවත් විකාශයකදීම යුධ බිමේ තොරතුරැ ජාතික මාධ්‍ය මධ්‍යස්ථානයෙන් කියලා පෙන්නන්නේ ඒවා තමයි.
ර‍ටේ ජාතික ආරක්ෂාව පිළිබද ප්‍රශ්නයක් වන දේවල් මාධ්‍ය මගින් පෙන්වන්න බැහැ ඒවා මාධ්‍ය මධ්‍යස්ථානයෙන් ගත යුතුයි කියලා නීතියක් ආවා. ............
දැන් ගමේ පොලීසිය හොර හරක් ඇල්ලුවත් ගන්න ඒ තොරතුරැ මාධ්‍යවලට දෙන්නේ පොලිස් මාධ්‍ය ප්‍රකාශක.
මෙයත් එක්තරා විදියක මාධ්‍ය මර්ධනයක් තමයි............
සිරස ට පමණක් නෙවෙයි සියළුම මාධ්‍ය ආයතන වලට තොරතුරැ දෙන්නේ එයාලා.
ඒ වගේම ජාතික රෑපවාහිනිය, ස්වාධීන රෑපවාහිනිය, ස්වර්ණවාහිනිය යුධ බිමට තමන්ගේ කණ්ඩායම් යවල තියෙනවා.
සිරස මේ සදහා අවස්ථාවක් ඉල්ලුවේ එකවාතවක් දෙකක් නෙවෙයි.
නමුත් ඒ සදහා අවස්ථාවක් නොදී
රටේ ප්‍රචාරයක් ගෙනියනවා සිරස යුධ පුවත් ආවරණය කරන්නේ නැහැ කියලා.
ඒකත් ජාතික ආරක්ෂාව පිළිබද ප්‍රශ්නයක් නිසා හඩක් නගන්න විදියක් නැහැ.
මේවා සාමාන්‍ය මිනිස්සු දන්නේ නැහැ.
මාධ්‍යවේදීන් මුහුණ දෙන ප්‍රශ්න වල සැබෑ තත්ත්වය නොදැන මාධ්‍යගැන ඇතැම් පිරිස් වෛරයකින් පසුවෙනවා.
අපි ඔවුන්ට ආරාධනා කරනවා එන්න ඇත්ත දැනගන්න

ටකරං මඩුවේ දුක්විදින පාසල් සිසුන්

2009-01-07T06:19:00.000+05:30

සුනාමියෙන් විනාශවූ ගිංතොට මහා විද්‍යාලයත්, කොග්ගල මාටින් වික්‍රමසිංහ විද්‍යාලයත් තාම පවත්වාගෙන යන්නේ ටකරන් මඩු වල. මේ පාසල් දෙකම හදන්න කොතෙකුත් රාජ්‍ය නොවන සංවිධාන ඉදිරිපත් වුනත් ඒවා ගොඩනගන්න පාලකයන්ට වුවමනාවක් තිබුණෙ නැහැ. ඔවුන්ට ලැබෙන කොමිස් මුදල මදි නිසාද කියලා හොයලා බලන්න ඕන. දැන් සුනාමියට අවුරැදු හතරක් ගෙවිලා නව පාසල් වාරයත් ආරම්භ වුනා. ඒත් මේ පාසල් දෙකේ දරැවන්ට තවමත් ඉගෙනගන්න පන්තිකාමර නැහැ. ගිය අවුරැද්දේ ගිංතොට ළමයි පාරට බැස්සේ තමන්ට පාසලක් ඉල්ලලා. ඒ වෙලාවේ එතෙන්ට ආපු මහ ඇමැති තුමා නලව නලවා කථා කරලා සුරංගනා පොරොන්දු ටිකක් දුන්නා. ඊට පහුවදා ළමයින්ව උසාවි ගෙනිහින් කලහ කරන්න එපා කියලා උසාවි නියෝගයක් ගත්තා. ගුරැවරැ කිහිපදෙනෙකුට මාරැවීම් ආවා. විදුහල්පති තුමා තම කැමැත්තෙන් විශ්‍රාම ගත්තා. තාමත් විදුහල හැදිල නැහැ. අපි කිහිප වතාවක් මේ විදුහල් ගැන කරැණු අනාවරණය කළා. ඒ හැම වතාවකදීම මහ ඇමැති තුමාට බොහොම රිදුණා. සුනාමි වතුර දැක්කෙවත් නැති එතුමාගේ ගමේ පාසල් කිහිපයකටම සුනාමි සල්ලි වලින් ගොඩනැගිලි හදල. අපි නැවත සංවිධානාත්මකව කරැණු අනාවරණය කරන්න තීරණය කළා....................
හඩක් නැති පාසල් සිසුන්ට හඩක් වෙන්න අපි සූදානම්.......................................
සිරස විමර්ශන මෙය අනාවරණය කරන්න කැමැත්ත පල කිරීමත් ශක්තියක් වුනා.

ආදරවන්තයාගේ වේෂයෙන් එන මාරයා

2009-01-05T20:40:00.000+05:30

තව ටික දවසකින් රටපුරා හැම තැනම ගොඩාක් ලස්සන මලක් පිපිල තියෙනවා දැකගන්න පුළුවන්. ඇත්තටම ඒ මල් පොකුරැ පිපුණු ගස් පුදුම ලස්සනයි. මේකට කියන්නේ වැලන්ටයින් ට්‍රී හෙවත් ආදරවන්තයන්ගේ ගස කියලා. ඒත් මේ ගස පිටුපස තියෙන කථාව ඉතාමත්ම භියකරැයි.
මේක අපේ රටට ආගන්තුක ශාඛයක්. ආදරවන්තයන්ගේ දිනය සමරන වකවානුවේ මලින් බරවන නිසා මෙය වැලන්ටයින් ශාඛය ලෙස හදුන්වනවා. මැලේසියාවෙන් ලංකාවට ගෙනාපු මේ ගස දැන් හැමතැනම පැතිරිලා. තද කොළපාට පත්‍රයේ යටි පැත්ත දම්පාට නිසා මේක පහසුවෙන් හදුනාගන්න පුළුවන්.
ඵල හට නොගත්තත් මුල් වලින් පමණක් නොවෙයි ඉතාමත්ම පුංචි ඉති කෑල්ලකින් පවා පැලවෙන මේ ගස වදකිරීම සිහිනයක් වෙලා. මැලේසියාව වගේ රටවල මේ ගස විනාශ කරන්න කෝටි ගණන් මුදල් වියදම් කළා. ඒ නිසා අපි මේ වතාවෙත් මල් පිපෙන වැලන්ටයින් ශාක සියල්ල විනාශ කරමු. මෙය පරිසරයට ඉතා අහිතකරයි. පරිසර අමාත්‍යාංශය මෙය වද කළ යුතු ශාඛයක් ලෙස නම් කර තිබෙනවා.
කරන්න තියෙන එකම‍දේ ගස උගුල්ලා ගිනිතබන එක. නැතිව මෙය විනාශ කරන්න බැහැ.
වසර 2000 දී මේ ශාඛයේ අවදානම් තත්වය පිරික්සන විට අවදානම් තත්ව හතක් දක්නට ලැබුණා. 2006 නැවත එහි අවදානම් තත්වය බලන කොට එය අවදානම් තත්ත්ව 11 බවට පරිවර්තනය වෙලා. ඉතින් ශාකය කොතරම් අපිට හානිකරද කියා අටුවා ටීකා අවශ්‍ය නැහැ.
අපි අපේ රටට ආදරය කරනවානම් ‍......... අපේ ස්වභාවික පරිසරය අපේම දරැ පරපුරට ඒ ආකාරයට උරැම කළ යුතුයැයි කියන මතයේ ඉන්නවානම් අපි මේ ශාකය විනාශ කර දමමු.

................. අනේ හාමුදුරැවනේ...................

2009-01-05T14:57:00.000+05:30

අතහැර,
සටන් පාඨ........
නවතා,
ජය ඝෝෂා හඩ...
අනේ හාමුදුරැවනේ........
කියලා දෙනවද මට............ ?
බුදු බණ ඩිංගත්තක්.....

ජනවාරි 04 - එකතුවීමේ අවශ්‍යතාව

2009-01-05T12:47:00.001+05:30

මහ ඇමැති තුමාගේ ලැප්ටොප් සිද්ධියෙන් පස්සේ අපේ අය නැවත සංවිධානය විය යුතුයැයි හඩක් නගනවා. ඒක හොද ප්‍රවණතාවක්. අතීතයේ පටන් ගත්තු මාධ්‍ය සංවිධාන පහක් විතර ගාල්ලේ තිබුණා. ඒත් ඒවා අඩපණයි. අපි අළුතෙන් එකක් පටන් ගත්තා. සියළුම දෙනා ඒකට සහභාගිවුනේ අළුත් පරපුර ගැන විශ්වාසය තියලා. ඒත් අපිට කාර්යබහුලත්වය නිසාම වැඩක් කරන්න බැරිවුනා. දැන් යෝධ ශක්තියක් එකතුවෙලා. වැඩක් කරමු කියලා හැමෝම කියන්නේ අවංක හැගීමෙන්. අපි එකා වගේ ඉන්නවානම් ඒකේ ශක්තිය ලැබෙන්නේ දුක්විදින ජනතාවට.............. හඩක් නැති මිනිසුන්ට හඩක් වෙන්න අපිට පුළුවන්...........

ජනවාරි 03 දා - මණ්ඩලේ කචල්

2009-01-05T12:40:00.000+05:30

මාතර අපේ සහෘදයා පොලිස් ඇප මත මුදා හැරීමට අපේම කට්ටියක් විරැද්ධ වෙලා. පොලීසියෙන් ඉල්ලලා තියෙනවා අපේ මාධ්‍යවේදියාට එරෙහිව නීතිය ක්‍රියාත්මක කරන්න කියලා.
මේකට හේතුවක් තියෙනවා. බොරැ වැරැද්දට පැටළුණු සගයා අති දක්ෂයෙක්. ඔහුගෙන් මග හැරෙන කිසිම පුවතක් මාතර දිස්ත්‍රික්කයේ කො‍හේවත් නැහැ. ඒ නිසා අපේ සාම්ප්‍රදායික මාධ්‍යවේදීන් ඔහුත් සමග තරහයි. ඉරිසියයි. මේ නිසා ඔවුන් බලන්නේ කල දුටු කල වල ඉහ ගන්න.
එක්තරා පුද්ගලයෙක් මේ සම්බන්ධයෙන් මටත් කථා කළා. ඔහු කියන්නේ අපේ මාධ්‍ය සගයා ඇත්තටම වරද කරැවෙක් කියලා. මම හිනාවෙලා නිකන් හිටියා. ඔහු වරදක් කර ඇත්නම් උසාවියෙන් දඩුවම් දේවි අපි ඉවසෙගන ඉදිමු කියලා මම ඔහුට නැවතත් කීවා. ඒත් ඔහු මට කියන්නේ නෑ එයාට එරෙහිව නැගී සිටින්න ඕන කියලා. හැබැයි මේ කියන කෙනාගේ අතිනි දූෂණය වුණු කිසිම කාන්තාවක් පොලීසියට ගිහින් නැහැ. ඔහුගේ ජංගම දුරකථනයේ තිබුණු නිරැවත් ඡායාරෑප මම මාස කිහිපයකට පෙර දුටුවා. ඉතින් මම මොනවා කියන්නද ........... ?
සත්‍රී දූෂක මාධ්‍යවේදියාට නිසි දඩුවම් දෙනු කියලා මාතර පෝස්ටර් ගහල කියලා හවස ආරංචි වුනා. ඒ පෝස්ටර් ගැහුවේ කව්ද කියලා අමුතුවෙන් කියන්න අවශ්‍ය නැහැ. වරදකරැවන්ට කාලයාගේ ඇවෑමෙන් දඩුවම් ලැබේවි.

ජනවාරි 02 දා - පොලිස් නීතිය

2009-01-05T12:36:00.000+05:30

අද දවසේ මොන විජ්ජුම්බරයක් වේවිද කියලා හිත හිතා අවදි වෙන කොට ආරංචි වුනා අධිවේගී මාර්ගයේ වැඩකරන විදේශිකයෝ වගයක් අපේ ගම්වල කෙල්ලන්ගේ නිරැවත් ඡායාරෑප අරගෙන රට යවලා කියලා. ඉතින් මේකට සම්බන්ධ කිහිප දෙනෙක්ම පොලීසියට ගේනව කියලත් ආරංචි වුනා. අනේ තකහනියක් අපි එ‍තැනට යනකොට කවුරැවත් නැහැ. පොලීසියේ හැමෝම කියන්නේ එහෙම දෙයක් නැහැ කියලා. අපිට විස්තර කිසිවක් හොයා ගන්න බැහැ. සමහරැ කියනවා ඕක පරණ සිද්ධියක්නේ කියලා. කොහොම වුනත් මට ආරංචිය දීපු හිතවතාට මම නැවත ඇමතුමක් ගත්තා. ඔහු පොලීසියට වඩා දේවල් දැනගෙන හිටියා. ඒත් ඔහු අවසානයට මෙන්න මෙහෙම කිව්වා.
මචං මේක යටගහන්න පොලීසිය ට්‍රයි කරනවා. ඒ නිසා අපි කොහොම හරි මේක හොයා ගනිමු.
අපි දන්නේ නැහැ පොලීසිය ඇයි වරද කරැවන් බේරන්න හදන්නේ කියලා.........................

ජනවාරි 01 දා - මාධ්‍ය මර්ධනය හා බදාගෙන කෑම

2009-01-05T11:56:00.000+05:30

අපේම මාධ්‍යවේදීන් සමග වැඩ කරන්න ගියහම ඔලුව අවුල් වෙනවා. ඒ නිසා ටික කාලයක් ති‍ස්සේ හිතාගෙන හිටියා දිනපතා ලැබෙන මාධ්‍ය අත්දැකීම් පොතකට ගොනු කරන්න ඕන කියලා. ඒත් ඒකට කාලයත් වෙලාවත් හොයාගන්න බැරැව හිටියේ. දැන් ඉතින් ඒ වැඩේ මේ විදියට පටන් ගන්න පුළුවන් වේවි කියලා හිතනවා. මේ සටහන තියන්නේ ජනවාරි 05 වැනිදා. ඒත් ජනවාරි මාසයේ 01 වැනිදා ඉදල සිදුවූ වැදගත්ම සිදුවීම් කිහිපයක් මේ විදියට සටහන් කරන්න පුළුවන්වේවි කියලා හිතනවා. මොකද ඒ ටික මට තාම මතකයි.

ජනවාරි 01 දා

දවස උදාවුනේ පුදුමාකාර කලබගෑනි කිහිපයක පෙරනිමිති පල කරමින්. මීට මාස හතරකට පෙර මාතර දිස්ත්‍රික්කයේ එක්තරා පොලිස් ස්ථානාධිපති වරයෙක් හොර ලී තොගයක් අරගෙන තමන්ගේ ගෙදර හදන්න අරගෙන යද්දී ‍තවත් පොලීසියකට කොටුවෙලා. ඉතින් මේ සිදුවීම අපේ සහෝදර මාධ්‍යවේදියෙක් පත්තරේට ලියල තිබුණා. මේ ස්ථානාධිපති වරයා අපේ මාධ්‍ය සගයාට තර්ජනය කරල තිබුණා. උඹට හොදින් ඉන්න දෙන්නේ නැහැ කියලත් තිබුණා. ප්‍රතිඵලය ආවේ ඊයේ 31. තරැණියක් බලෙන් රැගෙන ගොස් දූෂණය කිරීම, රන් භාණ්ඩ පැහැර ගැනීම සහ නිරැවත් ඡායාරෑප ගැනීම යන චෝදනා යටතේ අපේ මාධ්‍යවේදියාව අත්අඩංගුවට ගත්තේ අර ස්ථානාධිපතිවරයා.
පැමිණිළිකාර කාන්තාව මාතර රෝහලේ නේවාසිකව ප්‍රතිකාර ලබමින් සිටියා. අපේ මනුස්සයා ‍පොලිස් කූඩුවේ. 01 දවසේ වරැවක්ම ගතවුනේ මේ සිදුවීමට. ඔහු මෙයට වරදකරැ වුණොත් අවුරැදු 20 ක් පමණ බන්ධනාගාරයේ තපින්න වෙන බව අපි දැනගෙන හිටියා.
සුලමුල හොයාගෙන යනකොට කාන්තාව පිළිගත්තා ස්ථානාධිපති වරයාගේ උවමනාවට තමන් පැමිණිල්ලක් කළ බව. මාතර ජ්‍යේෂ්ඨ පොලිස් අධිකාරී වරයා‍ගේ මැදහත් වීමෙන් සිදුවූ පරීක්ෂණයකට පසු අපේ මාධ්‍යවේදියා ඇප මත මුදා හැරියා. අනාගතයේදී කවුරැ වරදකරැ වේදැයි අපි දන්නෙ නැහැ. මාධ්‍ය මර්ධනයේ පුංචි පුංචි අතු ඉති හැමතැනම පැවෙලා
හවස්වරැව ගතවුණේ තවත් මාධ්‍ය සටනකට. ඒ අපේම සහෝදර මාධ්‍යවේදියෙක් කරපු වැරදි වැඩක් නිසා. දකුණු පළාතේ ප්‍රමුඛ මාධ්‍ය සංවිධානය කියලා සංවිධානයක් පටන් ගත්තේ 2005 දී. මේකේ සභාපති අපේ ජ්‍යෙෂ්ඨ මාධ්‍ය‍වේදියකු වන කමල් විජේහේවා. ඔහු අපේ සගයන්ට පොරොන්දු වුනා හැමෝටම ජංගම දුරකථන අරගෙන දෙනව කියලා. ඒකනම් නැති වුනත් කමක් නැහැ. ඒත් මේ සදහා පළාතේ ප්‍රධාන ඇමැති තුමාගෙන් රැපියල් ලක්ෂ දෙකක් ලැබුණා. සල්ලි ලැබිලා මාස පහක් යනකන් රැස්වීම කැදවන්නේ නැතුව අපේ සභාපති තුමා ජංගම පරිගණක හෙවත් ලැප්ටොප් දෙකක් මිලදී ගන්න සූදානම් වුනා. අපි මෙයට විරැද්දව ඇමැති තුමාට ලිපියක් භාර දුන්නා. උත්තරයක් නැහැ. අපි අල්ලස් හා දූෂණ විමර්ශන කොමිසමට පැමිණිලි කළා. තවමත් උත්තරයක් නැහැ. අවසානයේ ඇමැති තුමාගේ ජංගම දුරකථනයට කථා කළා. අපි කිව්වේ ‍මේ උපකරණ පුද්ගලික පරිහරණය සදහා යොදවන්න එපා පොදු ස්ථානයක තබන්න කියලා. ඒකට දිස්ත්‍රික් ලේකම් තුමා තැනක් දෙන්නත් පොරොන්දු වුනා ඒත් ඇමති තුමාගේ මාධ්‍ය ලේකම් කියන්නේ රාජ්‍ය ආයතනයට ප්‍රතිපාදන දෙන්න බැහැ කියලා. ඒත් පුද්ගලයකුට ප්‍රතිපාදන දෙන්න පුළුවන්ලු. අවසානයේදී දේශපාලකයන්ගේ හිතවත් මාධ්‍යවේදීන් කිහිපදෙනෙක් ගෙන්වලා අර ලැප්ටොප් දෙක දුන්නා. අපි විරැද්ද වුනා. සභාපති තුමා මගේ බෙල්ල ගලවලා අතට දෙනවා කිව්වා. ඒ ඇමැති තුමාගේ හයිය වෙන්න ඇති. ඒත් ඔය කවුරැත් මැතිවරණයෙන් පස්සේ වෙනස් වෙනවා. ඒත් අපි මැරෙන තුරැ රස්සාව කරනවා. අපේ පෑන හොදට ශක්තිමත්. ගරැ ඇමති තුමනි ! ඔබ තුමා දැනුවත්ව හෝ නොදැනුවත්ව මාධ්‍යවේදීන් දෙදෙනකු වෙනුවෙන් ලබාදුන්නේ මහජන මුදල්. මේක මාධ්‍ය අයථා ලෙස පරිහරණය කරන්නත් මාධ්‍ය මර්ධනය කරන්නත් ගන්නා තවත් උත්සාහයක් ලෙසයි අපිටනම් පේන්නේ...........................

මිලිනවන මල් කැකුළු

2008-12-29T19:49:00.000+05:30

ශ්‍රී ලංකාවේ වාර්ෂිකව වාර්තාවන ළමා මරණ වලින් සැළකිය යුතු ප්‍රමාණයක් සිදුවෙන්නේ අනාරක්ෂිත ලිං තුලට වැටීමෙන්. මෙය සැබැවින්ම වළක්වා ගත හැකි මරණ.
පසුගියදා මට අසන්නට ලැබු‍ණේ ඊටත් වඩා දුක හිතෙන කථාවක්.
අම්ම සිංහල තාත්තා දෙමළ පවුලක එක දියණියක් හිටියා.
අම්ම දෙමළ තාත්තා සිංහල පවුලක කොල්ලෙක් එක්ක විවාහ වුණු ඇය දරැවන් හතර දෙනෙක් වැදුව.
මේ පිරිමියා තම බිරිදගේ නංගිවත් ගෙදර නවත්ත ගත්ත.
ලැයිම් කාමර ජීවිතේට ලිංගිකත්වය කියන එක පුද්ගලික දෙයක් වුණේ නැහැ.
ඉතින් නංගිටත් ළමයෙක් ලැබුණා. තාත්තා අර එකම පිරිමියා.
එක තාත්තගේ අම්මලා දෙන්නගේ ළමයි හැදුණෙ වැඩුනේ එකම ලැයිමෙ. එක පොල් පොදියට.
තමන්ගෙ දරැවන්ගෙ දරැවො බලාගත්තෙ සිංහල අම්මා ඇවිත්.
එක දවසක් මේ අත්තම්ම එක දරැවෙක් නිදිකරවන්න ලැයිම ඇත්තුලට ගියා.
අවුරැදු 11 වයස එක මිණිපිරියක් බාලම මුණුපුරා (වයස අවුරැද්දයි) බලාගෙන හිටිය.
ටික වෙලාවකින් අර මිණිපිරිය ගේ ඇතුලෙ
අත්තම්ම දුවල ගිහින් ගේ පිටිපස්සෙ බලනකොට මිණිපිරිය පිගන් හෝදන්න ගෙනාපු වතු භාජනේට අර දරැව වැටිලා.
හැමදේම ප්‍රමාද වෙලා. රෝහලට ගෙන ගිහින් දරැවගේ ජීවිතේ බේරගන්න බැරි වුනා.
මරණ පරීක්ෂණ‍යෙද තීරණය වුණේ දියේ ගිලී මිය යාමක් ලෙසින්.
ඒත් මරණය අතරතුර අහන්න ලබුණේ වෙනත් කථාවක්.
එක තාත්තා බෙදා ගන්න අම්මල දෙන්න අතර තිබුණු සීතල යුද්ධය නිසා ඒ දරැව ජීවිතෙන් වන්දි ගෙව්ව කියල ගමේ මිනිස්සු කියන්න පටන් ගත්තා.

මේ තමයි මගේ ආරම්භක සටහන

2008-12-29T19:41:00.000+05:30

නවීන තාක්ෂණය පුදුම එළවන සුළුයි. අපි පොඩි කාලේ මෙහෙම වැඩකරන්න හිතාගෙනවත් හිටියෙ නැහැ. ඒත් අපිට ඕන වුනා රට හදන්න. මේ රටේ පවතින විදිය වෙනස් කරන්න. ඒත් අපි ඒකට විප්ලවය තෝරගත්තේ නැහැ. මට හිතාගත්ත මාධ්‍යවේදියෙක් වීමෙන් මේ රටේ ජනතාවට යම් සේවයක් කරන්න පුළුවන් කියල. කොන්ද පණ තියෙන නිදහස්ව නිවහල්ව හිතන්න පුළුවන් මාධ්‍යවේදියෙක් වීම මගේ එකම අභිලාෂය වුනා. මම සාර්ථකද අසාර්ථකද කියන එක අද හෙට තීරණය කරන්න බැහැ. ඒත් මම හැමතිස්සෙම උත්සාහ කළේ සාර්ථක මාධ්‍යවේදියෙක් වෙන්න. මේ ඒ සේවයේ අන්තර්ජාල මෙහෙවරේ දෙවැනි පියවර. පළමු පියවර වුනේ අපි කිහිප දෙනෙක් එක්වෙලා මේ වන විට අත්හදා බලමින් තිබෙන enews.lk කියන වෙබ් අඩවිය.
අපිට ලැබෙන අත්දැකීම් රටේ තොටේ සිදුවන දේවල් වගේම අන්තර් ජාලයෙන් යම් මතවේදයක් ගොඩනගන්න මේ විදියත් හොදින් ගැලපෙනව කියන එක මගේ අදහසක්. ඉතින් අද 2008 දෙසැම්බර් 27 වැනිදා. මේ තබන පළමු සටහන දීර්ඝ මාධ්‍ය චාරිකාවක තවත් එක් අපූරැ අත්දැකීමක් වේවි කියලයි මගේ අදහස. මෙයට ආරම්භක ශක්තිය දීපු බන්දුල සහෘද්දයාට අනේක වාරයක් ස්තූතියි.